Naupang enkawlnaah ṭan kan lâk zual a ngai - PC Vanlalruata

Agriculture minister PC Vanlalruata chuan January 25, Ningani khan a bial chhung Chhingchhipa Zonu Lêng Rûnah Ṭawitlang Block MHIP Conference vawi 12-na a hmanpui a, "Ruih theih thil leh mipat hmeichhiatna hman khaw lohna lak ata kan ram leh hnam a fihlim theih nan naupang enkawlnaah ṭan kan lâk zual a ngai," a ti.

PC Vanlalruata chuan, Mizo hnam dam khawchhuahna tur leh a ropui theih nan pian pun a ṭul thu a sawi a, "Kan tu leh fa lo kal zel turte thinlungah hei hi kan tuh tur a ni. Naupang enkawlnaah nu mawhphurhna a sang em em," a ti a, naupang enkawl kawngah ṭan lâk lehzual a ngaih thu a sawi.

Hmeichhiate chu Pathianin ropui takin a siam a, mipa ropuite phènah hmeichhe fel tak an awm zel tih sawiin Minister chuan, "Ram leh khawtlang inrêlbàwlna pawh hmeichhe tel loin a kal tak tak thei lo," a ti a; hmeichhe dinhmun chàwikànna kal zelah India sorkarin MP leh MLA-ah hmeichhiate tan seat hauhsakna a siam dawn thu leh chuta tan chuan lo inbuatsaih turin Mizo hmeichhiate a duh thu a sawi.