NUA-in Siaha mi tualthihna an dem

Network for Unity Association, Mizoram (NUA) chuan thuchhuah siamin, January 24, 2024-a Siahaa auto-rickshaw khalhtu tualthihna chu an dem tak zet thu an tarlang a, tualthattute chu Myanmar aṭanga raltlante an nih loh thu an tarlang bawk.

NUA Mizoram chuan, Siaha lama pawikhawihna thleng tuartute an tawrhpui tak zet thu an tarlang a, "Tualthattute hi Arakan Army (AA) nena inkungkaihna nei nia hriat niin, Lawngtlai refugee camp-a awm an ni lo. January 20, 2024 khan an bike 125 Kenbo chhia chu refugee camp-ah a part a awm avangin rawn lei tuma lo lut an ni," an ti.

Tualthattute Myanmar raltlánte thil tih anga thuthang a awm chu pawi an tih thu tarlangin NUA chuan, "Pawikhawihtute nia rinte hi Arakan mi an ni a, kum tling lote an nih avangin an hming kan tarlang lo a ni," an ti a; an vaiin Arakan state aṭang rawn kal, Arakan mi an nia an hriat thu an tarlang.

NUA chuan, Myanmar ráltlânte theihtawpa ṭanpuia chhawmdawltu pawl hrang hrang leh Mizoram mipui chungah an lawm thu sawiin, "Misualte pawikhawihna avang hian tlânchhiat leh chuanna tur nei tawh lo keini refugee-te tan thil duhawm lo zawk a thlen loh nan Mizoram mipuite hriatthiamna leh khawngaihna kan ngen tak zet a ni," an ti.