Science leh maths-a ti ṭhate lawmpuina hlân

State Council of Educational Research and Training (SCERT) chuan January 25, Ningani khan an conference hall-ah science leh mathematics-a ti ṭhate chawimawina, Incentive Cash Award for Proficiency in Science and Mathematics hlanna inkhawm an buatsaih a; School Education minister Dr Vanlal-thlana'n a hmanpui.

Inkhawmah hian nikum HSLC leh HSSLC-a science leh mathematics-a a sang zual pathum (top 3)-te hnenah lawmpuina sumfai leh hûnmawi (memento) hlan an ni. HSLC-ah science subject-a zirlai 38 leh mathematics-ah zirlai 25 hnenah hlan a ni a; HSSLC-ah mathematics, physics, chemistry leh biology-a ti ṭha zirlai 18 hnenah hlan a ni bawk.

Dr Vanlalthlana chuan, zirlaite chu an kal zelna turah taima taka zir tgur leh an thiamna ramin a mamawh a ni tih hre reng turin a chah a, "Science leh mathematics hi zirna péng pawimawh tak, khawvel changkanna ṭhang zelah ngaih pawimawh loh theih loh a ni," a ti.

Technology chak taka ṭhang zel ûm pha tura insiam rem thiam tura zirlai leh zirtirtute chahin Minister chuan, "Zirlaite tan zirna leh kan hma hunah hlawhtlin tak tak kan duh chuan kan danglam ngam a ngai," a ti a; kawtlang leh kohhranah inhman dan tur chin tâwk hriat a pawimawh thu leh infiamna leh thil dangah chin tâwk neih thiam a pawimawh thu a sawi.

Khualzahawm Dr Lalzirmawia Chhangte, School Education secretary pawhin zirlaite fuihin, "Inelna sang tak khawvela chêng kan ni a, mi narân tan hna ṭha hmuh a har zel dawn. Mi narân ni lo, mithiam tak tak ni tura invawrh chhoh hi a pawimawh a ni," a ti.

Inkhawm hi SCERT director Zohminglian'n a kaihruai a, School Education director Lalsangliana pawhin thu a sawi. Incentive Cash Award for Proficiency in Science and Mathematics hi SCERT-a Science Promotion Wing bul tumin kum 1978 aṭangin sem ṭan a ni a, kumin hi vawi 46 semna a ni.