CM leh quarry neitute inkâwm

Chief minister Lalduhoma chu January 25, Ningani khan a pisaah Mizoram Quarry Association (MQA) hruaitute'n an kâwm a; quarry license chungchanga harsatna awm ṭhinah sorkarin single window clearance system kalpui dan a dap mek tih a lo hrilh.

Lalduhoma chuan, MQA hruaitute'n harsatna an tawh an sawite chu chipchiar takin a hnenah ziaka thehlut turin a chah a, "Licensing chungchanga harsatna, hun duh rei lutuk ṭhin hi sorkarin a hriatpui a, he harsatna sukiang tur hian sorkarin single window clearance system kalpui dan a dap mek a ni," a ti.

MQA hruaitute chuan, dan ang thlapa quarry kalpuitute an ni a, chhiah pawh sorkarah an pe ṭha ṭhin niin an sawi a, "Mahse, dan loa quarry siamte'n chhiah chawi ve loin thil an kalpui a, dan anga kalpuitute'n kan tuar nasa," an ti. Dan anga quarry neite chauhin lung an lâk theih nan hma la turin an ngen a ni.