KHAWTHLIR

Governor At Home

Governor Dr Hari Babu Kambhampati chuan nimin chawhma dar 11 khan Raj Bhavan tual (circular lawn)-ah thingpui inhona, At Home a buatsaih. At Home-ah hian Governor bakah chief minister Lalduhoma leh minister dang te, sorkar hotu lute leh mi pawimawh sâwm bik mi eng eng emaw zat an tel.

Free cardiac camp

Health & Family Welfare department leh Sri Ramachandra Medical Centre, Chennai ṭangkawp chuan February 9-10, 2024 khian zing dar 9 aṭangin State Referral Hospital OPD-ah lung (heart) natna neite tan a thlâwna inentirna, Free Cardiac Camp an buatsaih dawn. Cardiac Camp hi mipui náwlpui tan ni loin, doctor-te'n lung zai ngai nia an hmuh chhuahte leh enkawlna mamawhte tan bika ruahman a ni a, SRH OPD-ah zing dar 9-11 chhungin inziah luh theih a ni ang.

Cleanliness Drive

Tourism department, Champhai DMC Swadesh Darshan 2.0 leh Champhai College Yuva Tourism Club-te chuan National Tourism Day pualin January 25, Ningani khan Cleanliness Drive an buatsaih a; Champhai College zirlaite'n Chhangphut Field leh a chhehvela bawlhhlawhte an thian fai.

Births & Deaths registrar training

Saitual District Research Officer (DRO) office chuan January 25, Ningani khan Saitual Chawnpui YMA Hall-ah Registration of Births and Death Annual Training 2024 an buatsaih a, Births & Deaths district registrar Dr Lalngura Tlau, bawrhsapin a hmanpui. Training-ah hian Saitual district-a khaw 40 leh damdawi-in pasarih aṭangin RBD thawktu mi 37 an tel a ni.

VBSY kalpui

Sorkar laipui ruahmanna hrang hrang inzirtirna, Viksit Bharat Sankalp Yatra (VBSY) chu tun hnai khan Kolasib district-a Mualkhang leh Khamrang khuaah VBSY mobile van hmangin kalpui a ni a; sorkar laipui scheme hnuaia mipui hamṭhatnate inhrilhfiahna leh inziah luhna hun hman a nih bakah, a thlâwnin ngawr (TB), zunthlum leh thisen sang endikna buatsaih a ni.

END-in heroin an man

Excise & Narcotics Department (END) chuan nimin leh Ningani khan heroin kg. 1.314 (hawng 109) an man. Nimin zing khawvar hma, dar 1:30 khan Rengtekawn, Kolasib district-ah heroin gram 261.370 (hawng 13) an man a ni. January 25, Ningani tlai dar 3:15 khan Zanlawnah heroin kg. 1 leh gram 53 (hawng 96) leh a neitua - Kapthanruma (42) s/o Hlawntaia (L), Khawmawi, Myanmar leh Lalruatkima (51) s/o Biakmawia (L), Bualpui, Kolasib district nia inchhálte an man bawk. Heroin phurhna atana an hman Eeco van MZ-06 A-0057 an hréng nghal.