Inthlan vanga Covid-19 darh mai thei dinhmuna kan ding hi a pawi - Hawla

Mizoram Pradesh Congress Committee (MPCC) president Dr Lal Thanhawla chuan thuchhuah siamin, "Hmun ṭhenkhatah inthlan (village council & local council) vanga Covid-19 darh mai thei dinhmuna kan ding erawh a pawi ka ti hle a ni," a ti.

MPCC President chuan, Mizoram hmun tam zawkah VC leh LC inthlan tluang taka neih a ni chu lawmawm a tih thu tarlangin, tun ṭum inthlan result aṭangin Congress party-in hma lam hun duhawm tak a nei tih a chiang hle niin a sawi.

Dr Lal Thanhawla chuan, Congress sorkar hlim, kum 2009-a VC inthlanah INC-in VC 444 an lâk laiin MNF-in VC 30 chauh an la a, kuminah sorkar lai MNF phûr vanglai taka inthlannaah erawh MNF-in VC leh LC 374 an siam thei a, INC-in VC/LC 100 an lak thu a sawi a, "Congress party-ah mipuiin rinna an la nghat thûk hle tih a tichiang a, a lawmawm tak zet. Pathian awmpuina kan dawng zel a, ram rorelna fawng min chelhtir leh thuai dawn a ni tih a chiang hleah ka ngai," a ti.

VC leh LC inthlana Congress party ticket-a ding zawng zawngte a chhuan thu sawiin Lal Thanhawla chuan, "Nangmahni avangin kan party tan hma lamah káwl a êng hle a ni. Congress mipuite hmun tinah kan ngêlnghehzia a lang chiang a, a lawmawm em em a ni," a ti a; thlan tlinte chu ram leh khawtlang tana an rawngbawlna turah duhsakna a hlan rualin, tling zo ta lote chu hma lam pan zel turin duhsakna a hlàn a ni.