Sorkarin hlawh bat a rul ṭan dawn

Mizoram sorkar chuan, Covid-19 léng vanga sorkar hnathawkte hlawh a batsak chu August thla hlawh aṭangin a rûl ṭan dawn. Sorkar hnathawkte hi June leh July hlawh batsak an ni.

Finance department tarlan danin, sorkarin hlawh a bat chu pawisaa rulh duhte tan June thla hlawh bat chu August thla hlawhah rulh a ni dawn a, July thla hlawh chu September thla hlawhah rulh a ni ang. Hlawh batsak rulhna GPF-a dah duhte chu August-ah a vaiin sorkarin a dahsak dawn a ni.

Vanglaini palai zawhna chhangin Finance department hotute chuan, hlawh rulh tur zinga a tam zawkin GPF-a dah an duh thu an sawi a, "Pawisaa rulh turte chu GPF la nei ve lote leh group C ho an ni deuh ber," an ti a; hlawh batsakte rulh a nih avangin harsatna an tawh phah loh tur thu an sawi.

Tarlan tawh angin, Council of Minister chuan Covid-19 avangin sorkar hnathawkte hlawh chu June, July leh August thla bat rih turin a rél a; mahse, June leh July thla hlawh chiah a bá a, August thla hlawh chu a ba tel lo a ni.