Dy CM hlui dept. enkawla thubuaiah Lokayukta-in ACB an ngaichâng rih

Mizoram Lokayukta chuan deputy chief minister hlui Tawnluia enkawl department-a sum hman dik loh a awm nia thu an dawn chungchangah Anti Corruption Bureau (ACB) aṭangin chhànna an nghâk mek.

Mizoram Pradesh Youth Congress Committee (MPYCC) chuan July 10, 2023 khan Lokayukta chairman C Lalsawta hnenah complaint an thehlut a; khatih laia Assembly speaker Lalrinliana Sailo-in USA-a a zinnaah MNF sorkara deputy chief minister Tawnluia enkawl department hnuaiah cheng nuai 100 chuang hnathawh awm loa ziah ral a nih thu a sawi chungchang chhui turin an ngen a ni.

Lokayukta chuan ngenna an dawn chu zir chiangin, chhui chian tlâkah an ngai a, preliminary enquiry tih turin thutlukna an siam. July 18, 2023 khan preliminary enquiry ti turin ACB an hriattir a, ACB chuan August 1, 2023 khan first information report (FIR) an ziak lut.

ACB chuan preliminary enquiry an ti zui a, hun eng emaw chen an chhui hnuah October 13, 2023 khan an chhui chianna report chu Lokayukta-ah an thehlut a ni.

Lokayukta chuan ACB report chu a zir chian hnuah duhkhawp tâwk loh an nei a, information leh evidence (finfiahna) an duhte chu November 28, 2023 khan ACB-ah an dil. Lokayukta chuan ACB chhanna an ngaichâng mek a, chhanna an dawn hunah thubuai kalpui zel dan turah thutlukna an siam dawn a ni.