Duhsak záwng kan nei lo a, hlawhtling ngei tur kan zawng - CM

Chief minister Lalduhoma chuan, sorkar aṭanga hamṭhatna leh ṭanpuina inpekah a dawngtu tur thlannaah duhsak zawng an nei lo a, hlawhtling ngei turte an zawn thu a sawi.

CM Lalduhoma hian January 27, Inrinnia Thenzawl Dragon Fruits Growers & Marketing Society-in Gaby's Farm-a General Assembly vawi thumna an hman a hmanpuinaah thu a sawi a; tun hnaiah Mizo ṭhalai fing leh thiam tak tak, kutkawih eizawnna lama hmangchang hre tak tak an pung zel tih sawiin, "Heng ṭhalaite hi sorkar chuan an bánah kaiin kan hnûk dâwr dâwr dawn a ni," a ti.

Lalduhoma chuan, "Hmasawnna hna engkimah kan sorkar chuan a dawngtu beneficiary tur thlanah duhsak zawng a nei lo a, hlawhtling ngei turte a zawng a ni. Eng party pawh lo ni u la, kan thliar lo che u," tiin, an huante chu tipuitling ngei turin a chah.

Lamlian Dung Zauah Thenzawl mite'n dragon fruit an thar mek thu leh an hmalaknaah sorkar sum leh huan neitute sum tam tak sên a ni tawh tih sawiin Duhoma chuan, "A puitlin ngei a ṭul a, a puitlin theih nana in mamawh ber chu a panna kawng ṭha a ni a, a panna kawng en hi vawiina ka lo kal chhan a ni. Sialsuk dái emaw, a remchanna hmun aṭanga huan hmun panna tur kawngpui siam nan cheng vbc. 31.84 kan dah hrang tawh," a ti a, kawng ṭha tak siam an tum thu a sawi.

Chief Minister chuan, tui lâkna tur pawh hun remchangah sorkarin a la ngaih-tuahsak tur thu a sawi a; an thar chhuahte leitu tur Local Soda Pvt. Ltd nen thawhhona an siam chu lawmawm a tih thu sawiin, "Local Soda hian kut hnathawktute thlai thar an leisak a, an process a, hma an sawn zel dawn phawt chuan Hand Holding Policy hnuaiah kan thawk dûn theiin a rinawm," a ti.

Dragon fruit chíngtute inkhawmpuiah hian Adviser to CM H Ginzalala, MLA pawhin thu sawiin, Mizoramin kal dan thar, tih dan thar, hmasawnpui theih tur a mamawh tih a sawi a, "Rah chhuah nei, hnathawh tur siam chhuaktu tur hmalakna hi kan ngah deuh deuh a ṭul a, chu kawng chu zawh tumin CM ṭha tak kaihhruaina hnuaiah kan kal chho mek a ni," a ti a; chîn dan thar nei thei turin mipui thinlung a inpeih ve a ngaih thu a sawi.

Lamlian Dung Zauah hian kum 2021 aṭangin chhungkaw 50-in ram hectare 82.79-a zauvah dragon fruit an chíng a, sorkarin MIDH, FOCUS leh ṭanpuina dangte hmangin unit 129 siamna a pe a, drip irrigation system a pe bawk. Unit khat hi ban 200 zel a ni.

Sorkarin a ṭanpuina leh mimal hmalaknate nen unit 150 an nei tawh a, a vaiin dragon fruit kûng 30,000 vel neiah an inngai. Ban pakhatah kum tin kg. 30 vel a rah thei a, an dragon fruit-te a puitlin vek hunah chuan kum tin cheng nuai 300 man vel an thar thei turah an inngai a ni. An dragon fruit tharte lei turin kum thum chhung atan Local Soda nen inremna an ziak a, kumin aṭangin farm gate-ah kg. khat Rs 150 zelin an leisak dawn a ni.