Mizoramah power dawng lo an awm loh nan hma la turin Union Minister-in a chah

Power & Electricity (PE) minister F Rodingliana chuan tun hnai khan New Delhi-ah Union Power and New & Renewable Energy minister RK Singh a pisaah a kâwm. Union Minister chuan, Mizoramah kawlphetha la dawng ve lo khua emaw, chhungkua emaw an awm loh nan hma la turin a lo chah.

Sorkar thuchhuah tarlan danin, F Roding­liana hian Union Minister hnenah hian Mizoram leilung leh kawng awm dante'n a zir loh avanga scheme leh project hnathawhnaah bungraw phurh kualna man a sàn bik dan a hrilh a; RK Sing chuan, project proposal amount sang deuh bik a awm pawhin ngaihhnathiamna nen an lo ngaihtuah zel tur thu a lo hrilh.

RK Singh hian kawlphetha lâk leh sem dan kalphung tih­changtlunna tur, Central Scheme Revamped Distribution Sector Scheme (RDSS) hnuaia smart metering leh thil dangte thawhna tur pawisa chu tun financial year chhung ngeia pek chhuah a nih tur thu Rodingliana a hrilh a; Mizorama kawlphetha la dawng ve lo khua emaw, chhungkua emaw an awm loh nan hma la turin a chah bawk.

Union Minister RK Singh chuan, Mizoram tan 10% Gross Budgetary Support hnuaia power project paruk thawhna tur sum cheng vbc. 273.21 chu DoNER Ministry lama tihfel ngai la awmte tihfel nghal a nih tur thu leh a rang thei ang bera pek chhuahtir a tum thu a sawi a, "Mizoram ang tlang ram mil tur small hydel project siamna tur scheme thar duan a ni a, Cabinet pawmpui tura chhawp mek a ni," a ti a, Cabinet pawmpuina hmuh a nih veleh ruahmanna thehlut tura Mizoram an rawn hriattir nghal tur thu a sawi.

In chunga ni zung chakna hmanga kawlphetha siam (solar energy)-a sorkarin sum a tum (subsidy) rate chu 40% aṭangin 60%-ah tihsan a nih tur thu sawiin RK Singh chuan; phal zat bituk awm loa ruahmanna lut ang ang an lo pawmsak tur thu F Rodingliana a hrilh.

Mizoram PE Minister-in tun lai thiamna thar ber hmanga Mizorama Pumped Storage Hydropower Project hman a nih ve theih nana project kalpui mekna state - West Bengal leh Andhra Pradesh-a hmalak dan kimchang zir chiang tura Mizoram aṭanga study team tirh a dilna chu Union Power Minister chuan a remti bawk.

F Rodingliana hi New Delhi Mizoram House-a additional resident commissioner Alexander V Chongthu-in a ṭawiawm a ni.