MGNREGS hnuaia hlawh tur sum pe thuai turin RD Minister ngen

Rural Development minister Prof. Lalnilawma chuan January 26, 2024 khan sorkar laipuia Rural Development minister Giriraj Singh chu a chenna inah a hmu a, MGNREGS hnuaia hlawh tur sum pe chhuak thuai turin a ngen.

Prof. Lalnilawma hian RD minister thar a nih anga hmachhawp a neihte Union RD Minister a sawipui a; MGNREGS (ni 100 inhlawhna) hnuaia inhlawhnaa hlawh tur December 2023 leh January 2024 pe chhuak thuai turin a ngen. March thla thlenga wage component chhût chhuah sate pawh a hun taka pek chhuah a nih theih nan hma la turin a ngen bawk.

Union Rural Development minister Giriraj Singh chuan, Lalnilawma thu thlen chu a rang lama bawhzui a tum thu a lo hrilh a ni.

PHE minister Prof. Lalnilawma hian January 26 vêk khan Union Jal Shakti minister Gajendra Singh Shekhawat pawh a chenna inah a kâwm bawk a; Reiek khaw bula ruahtui khâwlna atana Tan lui khuahna tur leh pilot project atana district tina ruahtui khawlna tur tuikhuah siam theihna hmun remchang zawn chhuah a, zirchianna tur sum mamawhte pe turin a dil. Jal Shakti Minister chuan, theihtawp chhuaha kawng zawn a tum thu a sawi.