Ramri uluk leh zuala ven an rêl

Central Young Lai Association (CYLA) hruaitute leh 20th Assam Rifles, Southern Mizoram hotute chuan January 27, Inrinni khan Mizoram chhim lam, khawthlang lam ramria venhimna chungchanga thawhho dan tur an sawiho a, uluk lehzuala ramri vèn an rêl.

CYLA hruaitute aṭanga thu dawn danin, Mizoram chhungah ram páwn aṭanga ruihhlo tawlhrûk a ni ṭhin ngei tih hriat a ni a, Lawngtlai district pawh dan loa sumdawnna kalpui ṭhinte kalkawng remchang a nih avangin CYLA hruaitute leh Assam Rifles-te chuan ramria lut leh chhuakte uluk lehzuala endik ṭhin an rêl.

Tun hnaiah Mizoram chhungah ram dang mi kut tuara thi hial an awm tâk avang pawhin ramria lut chhuak chungchangah fimkhur lehzuala hmalak a, mipui himna tura endik ṭhin ni se, tih a ni.

CYLA ngenna angin army pre-recruitment training, student tour leh Zochachhuah-Dumzautlang inkar lui kân tur friendship bridge siamte pawh Assam Rifles hotute chuan tihlawhtlin an tum thu an sawi.

Inkhawmhonaah hian Assam Rifles aṭangin 20th AR commander Col. Jaswinder Singh bakah officer pahnih an tel a; CYLA aṭangin president HC Vanlalruatpuia, general secretary Joseph Lalhmingthanga Chinzah leh committee member pahnih an tel a ni.