Integrated Livelihood Promotion-a Loneih leh ranvulh ṭanpuina sawiho

Khawzawl bawrhsap K Lalrohlua hoin tun hnai khan DC meeting hall-ah National Bank for Agriculture Development (NABARD) leh North East Initiative Development Agency (NEIDA) ṭang dunin Khawzawl district-a khaw pali - Khawhai, Chawngtlai, Neihdawn leh New Chalrang khuaa ‘Integrated Livelihood Promotion’ hmanga loneih leh ranvulh ṭanpuina an pek tur chungchang sawiho a ni.

Integrated Livelihood Promo­tion hi Tribal Development Fund hnuaia ruahman a ni a, project atan NABARD aṭangin Rs 1,36,58,500 leh NEIDA aṭangin Rs 52,11,000 hmuh a ni dawn a, a vaiin Rs 2,13,74,500 a ni ang.

Project hnuaiah hian Chawngtlai, Neihdawn, Khawhai leh New Chalrang khuaa chhungkaw 40 ṭheuhte'n thlai chi hnih - dragon fruit leh chánâ (garden pea) an chíng ang a; Chawngtlai, Neihdawn leh Khawhaia chhungkaw 10 ṭheuhin ar an vulh bawk dawn a ni.

Project hnuaiah hian thlai chìnna senso, lei luang ral tur vênna (soil conservation), tuihna tihpun (water resource development), ran vulh senso (poultry development), hmanraw dah khawlna (custom hiring center), entry point activity hmanga kut hnathawktute hahchawlhna hmun sakna tur te, thlai thar ṭhat zawng thliarna hmun (grading center), training senso atan te, project enkawlna senso turte bakah, hriselna kawnga kut hnathawktute enkawlna turte ruahman a ni.