Tualthihna thleng avangin MTP-in dem an hlawh, hriatthiam harsa an ti

Mara ṭhalai pawl, Mara Thyutlia Py (MTP) Headquarters hruaitute chuan, KL Zoasa, Siaha tualthihna chungchangah MTP Hqrs. dem an ni leh tualthattu hum tum ang hiala puh an ni chu hriatthiam harsa an tih thu a sawi.

MTP hruaitute hian January 27, Inrinni khan thuthar thehdarhtute an kâwm a; MTP president Pakhaw Chozah chuan, KL Zoasa thihna chungchanga an hmalak dan thuthar thehdarhtute hrilhfiahin, "He chhiatna rapthlak tak thleng vanga mipui, MTP member-te leh Central YLA hruaitu leh YLA branch-te thawhhona leh inpekna lawmawm kan ti tak zet," a ti.

MTP general secretary Israel Chozah sawi danin, ruang an dahna hrilh turin Tuipui Ferry aṭangin tualthattute zinga mi pakhat an hruai a, nasa takin police nen inchuhin, ruang an hmuh hnuah pawh police-te'n Lawngtlai chhuahsan thei lo tura an dan beh tlat hnuah MTP leh CYLA-te ṭang dunin theihtawpin an nawr a, chumi hnuah an thutiam ang ngeiin tualthattu chu Tuipui Ferry thlenpui a ni.

Tuipui Ferry-ah IR police tam tak nen innawrin, police-in an tam hneh êm avangin tualthattu chu police-in an la a, hliam leh kut inthlak pawh a awm nual a ni.

MTP hruaitute chuan, an thutiamah ding nghetin, tualthattu chu Mara leilung an thlenpui tih an sawi a, "MTP demna leh tualthattu hum tum ang hiala puh kan ni hi hriatthiam har kan ti hle," an ti.

Hetih rual hian, KL Zoasa thihna chungchanga thâ leh zung, sum leh pai nena thawktu páwl hrang hrang leh KL Zoasa tuarpuitu zawng zawng chungah an lawm thu an sawi bawk.