Hmunphiah chíngtute harsatna enfiah thuai turin sorkar phût

Congress party hruaitu ṭhenkhat chuan January 27, Inrinni khan Vairengtea Forest check gate an tlawh a; Zodintluanga Ralte chuan, Mizoram sorkarin Vairengte Forest check gate-ah hmunphiah an kaltlangtir lo nia sawiin, a rang lama enfiah turin sorkar a phût.

Zodintluanga Ralte chuan, "Mizoram sorkar, kut hnathawktu ngai pawimawh inti sorkar thar, kalphung thar tia mipui hnena inzuarte'n Vairengte hmunphiah chíngtute a ngaihthah hi Mizoram mipui zah lohna leh hmunphiah chíngtute hmuhsitna a ni. A rang thei ang bera hmunphiah chíngtute harsatna sutkiansak turin Chief Minister ka ngen a ni," a ti.

Tunlai hi hmunphiah keh hun lai tak a ni tih sawiin Zodintluanga chuan, "A par tawh chuan kg. khatah Rs 8 báwrin an hralh thei chauh a, a man a tlahniam nasa hman tawh ṭhin," a ti a; hmunphiah chíngtute'n sorkar thuchhuah an nghak a, beidawng takin an hmunphiah pár tur an thlir mek nia sawiin, an harsatna a rang thei ang bera chingfel turin Mizoram sorkar a ngen a ni.

Zodintluanga Ralte chuan, kum dangah chuan tun ang hunah hmunphiah man (rate) sáng tak takin an hralh tawh ṭhin nia sawiin, tuna hmunphiah chíngtute harsatna chu sorkarin an tan hmalakna a neih loh vangah a puh a, "Hmunphiah hringa hralh tur nei an nih deuh vek avangin hmunphiah hralhnaah harsatna an tâwk nasa a, Vairengte Forest check gate-a a kaltlang thei lo hi a lungchhiatthlak hle a ni," a ti.