Saitualah vote tla tisang tura ṭan lak rêl

Chief electoral officer Madhup Vyas chuan January 27, Inrinni khan Saitual a tlawh a, Lok Sabha MP inthlan awm tura inbuatsaihnate sorkar hotute a sawipui bakah, electoral roll awm dan a enfiah. Saitual district-a vote tlak ṭhat lohna hmunah 5% tala vote tla tisang turin ṭan lak an rêl.

Saitual district election officer Dr Lalngura Tlau leh Election hotute nen Saitual DC conference room-a an inkawmnaah Madhup Vyas chuan, MLA inthlanpui neih zawh tâkah Saitual district-ah felfai takin inthlan buatsaih a ni tih a sawi a, "Kan hmaa MP inthlan awm turah pawh theihtawpa ṭan lak a ngai. A bikin vote tla tlemna leh critical polling station area bikte vote tla chawhrual a pun theih nan hmalak a ṭul," a ti.

Ṭhutkhawmah hian kumina Lok Sabha inthlanpui awm tura hmalak dan turte sawiho a ni a; EO, ERO leh AERO-te indaih lohna te, venhimna chungchangte an sawiho. MLA inthlanpuia vote tla aia hniam lo tura ṭan lâk leh vote tlak ṭhat lohna hmunah 5% tala vote tla tisang turin Systematic Voters' Education and Electoral Participation (SVEEP) hmanga ṭan lâk an rêl a ni.

CEO Madhup Vyas hi additional chief electoral officer Amol Srivastava-a'n a ṭawiawm a ni.