AR leh BSF-te'n R-Day an lawm

Mizorama India ramri (international border) vengtu Assam Rifles leh Border Security Force (BSF)-te chuan January 26, 2024 khan ramri hnaih khaw hrang hrangah tualchhung mite leh zirlai naupangte Republic Day vawi 75-na an hmanpui.

Assam Rifles chuan khaw hrang hrangah khawtlang hruaitute leh zirlai naupangte Republic Day hmanpuiin, hnam puanzar an pawt pharh a; hmun ṭhenkhatah chuan zirlaite'n hnam puanzar kengin khelmualah rally an nei a ni. Zirlaite chu Republic Day awmzia leh a ropuina an hrilhfiah a; zirna sikula an mamawh tur hmaraw ṭhenkhat an sem bawk.

BSF 38th Battalion pawhin Marpara border out post-ah Republic Day vawi 75-na an lawm a, BSF mi leh sate leh tualchhung mite an tel a, Aizawla BSF DIG Kalyan Kanti Majumdar-a'n a hmanpui. BSF 184 battalion commandant Ahsan Sahadi, Aizawla Sector Headquarters commandant Dinesh Pal Singh ten an hmanpui bawk.