Vawiinah JEE exam ṭan dawn

National Eligibility cum Entrance Test (NEET) leh Joint Entrance Examination (JEE) sawn a nih theihna atana hma la tura chief minister Zoramthanga an ngen chungchangah MZP chuan nimin tlai dar 4 thleng khan chhànna an dawng lo. JEE hi vawiin aṭanga exam tur a ni.

Vanglaini palai zawhna chhángin MZP general secretary Lalnunmawia Pautu chuan, Chief Minister hnena ngenna an thehluh chungchangah chhànna an la dawn loh thu leh an ngaihchân reng thu a sawi.

Tarlan tawh angin, MZP leh NEET leh JEE exam tumte chuan Covid-19 lêng vanga harsatna hrang hrang a awm avangin exam hun sawn a nih theih nan hma la turin August 29, 2020 khan Chief Minister an ngen a ni.

JEE hi September 1-6, 2020 chhunga exam tur a ni a, Mizoram aṭangin exam tum mi 800 vel an awm. NEET chu September 13-ah exam tur a ni a, Mizoram aṭangin exam tum zirlai 1,300 vel an awm a ni.