KHAWTHLIR

ATC-in thisen pe

Student Christian Movement of India (SCMI), Aizawl Theological College chuan January 27, Inrinni khan Synod Hospital tan thisen unit 67 an pe a, petute mipa 64 leh hmeichhia pathum an ni.

Interview buatsaih

Home minister K Sapdanga chuan January 27, Inrinni chhun khan a bial Aizawl North-III huam chhunga páwl leh mipui tan Chanmari West Local Council House-ah amah biak theihna hun a buatsaih a, bial mi eng emaw zatin hmuin, an duh leh mamawhte an thlen. Chawhmaah Electric Veng, Zarkawt leh Chanmari mite tan leh chawhnuah Chanmari West, Hunthar Veng leh Edenthar Veng mite tan hun hawn leh a ni. K Sapdanga hian January 20, 2024 khan Chanmari YMA Hall-ah a bial mite tan interview hun a buatsaih tawh bawk.

Ex-Servicemen Rally huaihawt dawn

Assam Rifles-te chuan vawiin leh naktuk hian Lammualah Joint Assam Rifles leh Army Ex-Servicemen Rally an buatsaih dawn a, Assam Rifles hotu lu ber, director general Lt.Gen. PC Nair-a'n a hmanpui dawn. Rally chhungin sipai bángte hamṭhatna tur thil chi hrang hrang pek a ni dawn a, sipai bángte leh an chhungte chu tel vek turin an sáwm a ni.

Bâwng leh kêl vulhna bawhzui

Animal Husbandry & Veterinary minister F Rodingliana chuan tun hnai khan New Delhi-ah sorkar laipuia Fisheries, Animal Husbandry and Diarying minister Parshottam Rupala a kâwm a, Mizoram sorkarin bâwng leh kêl vulhna tur project a thehluh tawh a bawhzui. Union Minister chuan, central scheme hnuaiah project ṭha tak tak a awm thu sawiin, February 15, 2024 hmaa bawhzui leh turin a lo chah a ni.

Phár Pathianni

Nimin Pathianni kha Baptist Church of Mizoram ni pawimawh, 'Phar pual Pathianni' a ni a, urhsûn takin an hmang. Phâr Pathiannia inkhawm thawhlawmte chu phárte enkawlna atan hman tur a ni. The Leprosy Mission chuan India ramah phár enkawlna damdawi-in 14 bakah, phár dam lehte eizawnna tur zirtirna vocational training centre paruk leh Mercy Home panga an nei mek a ni.