Vawiinah Assembly session ṭan dawn MLA-te'n Covid-19 an vei lo tih finfiah

Mizoram Legislative Assembly session chu vawiin chawhma dar 10:30 hian ṭan a ni dawn a, September 3, Nilainiah zawh a ni ang. Session neih a nih dawn avang hian MLA-te chu Covid-19 an vei leh vei loh endik a ni a, hripui an vei lo tih finfiah a ni.

Speaker Lalrinliana Sailo kaihhruai Assembly Business Advisory Committee-in an rêl dan chuan, vawiin, session ṭan níah session liam ta leh tun ṭum session neih tur inkara MLA thi mi panga sûn a ni dawn a, zawhna leh chhànna hun hman a nih dawn bakah, sorkar thil pawimawhte ngaihtuah a ni ang. September 2-3 ah chuan zawhna leh chhànna hun hman a ni ang a, sorkar thil pawimawh ngaihtuah tur a awm chuan ngaihtuah a ni bawk ang.

Thuthar thehdarhtute zawhna chhangin Lalrin­liana Sailo chuan, Covid-19 léng mah se, ram danpuiin Assembly session ṭhut­khawm hnuhnung ber leh a dawt leh tur inkarah thla ruk aia tam a tla tur a ni lo, a tih avangin session chu kaltlangpui a ngaih thu a sawi.

Session neih turah hian zawhna ziaka chhàn chi (unstarred question), House-a chhàn chi (starred question) leh paper pharh tur eng emaw zat a lut a; Assembly session kalphung pangngai angin, starred question chu ni khatah 20 zel a lut ang.

Session neih a nih dawn avang hian nimin khan chief minister Zoramthanga leh speaker Lalrinliana Sailo tiamin MLA 35-te chu Rapid Antigen Test (RAT) hmangin Assembly Secretariat-ah Covid-19 an vei leh vei lo enfiah a ni a, an vaiin an vei lo tih finfiah a ni. Nimina endik ve loh MLA dang pangate chu tun hnai khan Covid-19 an vei lo tih finfiah a lo ni tawh.

Health department chuan, Assembly session chhunga nodal officer turin Aizawl Civil Hospital-a deputy medical superintendent Dr John Zohmingthanga a ruat a, a thawhpuite nen session hi an vil dawn a ni.

•    99F aia sang khawsik nei, tun hnaia khuh, thaw-hah leh áwm na nei

•    Tun hnaia khung hran mek nena inhnimhnaihna nei

•    Containment zone/lockdown area chhunga chengte

•    Covid-19 vei chenpui emaw, tun hnaia hripui vei nena inhnimhnaihna nei

•    Covid-19 lan chhuah dan (symptom) nei