KHAWTHLIR

Governor PS Sreedharan Pillai chuan nimin khan Covid-19 dona atan Chief Minister's Relief Fund-ah August thla hlawh aṭangin 30% (Rs. 1,05,000) a thawh. Nimin vek khan dy. govt. chief whip Lalrintluanga Sailo pawhin August thla hlawh basic pay aṭangin 50% (Rs. 40,000) chu CM Relief Fund-ah hian a chhung lut.

Lawngtlai District MJA Executive Committee nimina ṭhukhawm chuan, an district-a chanchinbumite beh­chhan a thuchhuah 'Press Release' tih ni si, press mite hnena thleng lo tam lutuk chu an ngaih­mawh thu an tarlang. Press release hming pu si, chanchinchinbu mite'n an thehdarh lo a nih pawhin, press release siamtute chu chanchinbumite hrethiam turin an beisei a ni.

Kolasib SP chuan National Highway 306, Kolasib-Aizawl (via Sairang Road) inkar kawngpui siamṭhat hna thawh mek a nih avang­in, NH kawngpui lirthei tlân hun a siam. Lirthei tlân hun tur chu - Kolasib lam aṭangin zan/tlai dar 6 aṭanga zanlai pelh dar 1 inkar a ni a, Aizawl lam aṭanga kal tan zan dar 1 aṭanga zing dar 6 a ni.

Covid-19 vei pakhat chu Covid Care Centre, ITI aṭangin nimin khan State Referral Hospital-ah sawn a ni a, ani nen hian SRH-ah hian hripui vei mi 73 enkawl mek an ni. SRH-ZMC Bulletin tarlan danin, Covid-19 vei vanga enkawl mek mi 73 zinga pakhat chu SICU-ah awmin, mi dang zawng Isolation Ward-ah an awm a, mi pakhatin khawsik leh thaw-hah a nei tih loh chu harsatna nei an awm lo.

Chief Minister phalna leh Committee on Utilization of Chief Minister’s Relief Fund for Covid-19 ten August 21, 2020 an rel angin, August 28, 2020 khan CM Relief Fund for Covid-19 aṭangin Rs. 6,52,519 pek chhuah a ni. Sum hi Mizoram House hrang hranga Covid-19 vanga tangkhangte chaw ei man bá pek tlakna tur a ni.