Covid-19 nena chenho zir a ngai - Lunglei CMO

Lunglei chief medical officer (CMO) thar Dr Lal­thlamuana chuan nimin khan a pisaah thuthar thehdarhtute a kâwm a; Covid-19 nena chenho zir a ngaih thu a sawi.

Dr Lalthlamuana chuan, Health department leh media-te'n thawhhona ṭha tak an nei ṭhin chu lawmawm a tih thu sawiin, "Health department thil tumte tihlawhtling turin department hrang hrang, tlawmngai pawl, khawtlang hruaitute leh mipui nen thawhhoa hmalak tlân a ṭul ṭhin," a ti a; department hmalakna puanzar leh department-te finchhuah kawngah media mite chu thawhhopui a duh thu a sawi.

Covid-19 chungchang sawiin Lunglei CMO chuan, "Kan district-ah Covid-19 vei, Pukpui CCC-ah mi 36 leh Zobawk CCC-ah mi 20 enkawl theih a ni a, mi 100 enkawl theihna tur ruahman mek a ni. CCC building thar sakna atan cheng nuai 85 rua­hman a ni a, hei hi Lunglei HPC kaltlangin sorkar hotute hnenah thehluh thuai tum a ni," a ti. Covid-19 nena chenho zir a ngai dawn tih sawiin, "Buai phílí loin, sorkar dan zam - social distancing, mask vuah, kut silfai, sanitizer hmante zawm ṭheuh a pawimawh," a ti.

Lungleia senior medical of­ficer Dr Lalrinthangi tarlan dan­in, kumin (January-July) chhung­in Lunglei district-ah sikserh vei mi 1,887 hmuh chhuah a ni tawh a, thih phah an la awm lo. Sikserh vei hmuh chhuahte zinga 80% chu khawtlang lama hmuh chhuah a ni a, 20% chu khawpui chhunga hmuh a ni.