Mipuiin thlamuang takin vote an thlâkin ka hria - Lunglei DC

Lunglei bawrhsap V Lalsangliana chuan nimin khan DC conference hall-ah village council inthlan neih zawh tak chungchangah thuthar thehdarhtute a kâwm a; mipuiin thlamuang takin vote an thlaka a hriat thu a sawi.

V Lalsangliana chuan, VC inthlan hlawhtling taka kalpui a nih thu sawiin, "Kan district-ah vote awm 87,773 aṭangin vote 67,225 a tla a, 76.59% a ni a, mipuiin thlamuang takin vote hi an thlak niin kan hria. Inthlanna hlawhtling tak kan neih theih nana theihtawp chhuahtu department hrang hrang, sector magistrate, polling official, YMA, media leh mipui chungah lawmthu ka sawi a ni,” a ti.

VC inthlan atan Lunglei district-ah returning officer mi 113, presiding officer mi 133 leh polling office mi 260, an vaiin polling official 506 ruat an ni a; sector magistrate 15 leh sector police officer 15 ruat niin, VC constituency hrang hranga duty tur police mi 115 ruat a ni bawk.

Vote tlak ṭhatna ber chu voter 122 awmna Hlûmtê niin vote 121 (99.18%) a tla a, vote tlak chhiatna ber chu vote 455 awmna Upper Lungrang South niin, vote 159 (34.95%) a tla a ni.