Kum 2023-ah TB vei 2,272 hmu chhuak; Aizawl dist.-ah TB vanga thi tam ber

Mizoramah kum 2023 chhungin TB (ngawr) vei mi 2,272 hmuhchhuah an ni a, TB vangin mi 108 an thi. TB vanga thi hi Aizawl district-ah an tam ber.

Nimin khan Directorate of Health Services old building conference hall-ah National TB Programme Annual Review Meeting neih a ni a, National Health Mission mission director Dr Eric Zomawia'n a hmanpui.

Thlirletna-a tarlan danin, kum 2023 khan Mizoramah TB vei nia rinhleh mi 17,432 endik a ni a, he'ng zinga mi 2,272 chuan TB an vei tih hmuh chhuah a ni. Nikum chhung khan TB vangin mi 108 an thi a, TB vanga thi zinga mi 70 (64.81%) chu Aizawl district-a mite niin an tam ber a ni.

Kum 2023 chhunga TB vei hmuhchhuah zinga 164 chu multi-drug resistant TB (MDR-TB) vei an ni a; TB vei hmuhchhuah zingah hian 5% chuan zunthlum an nei a, vaihlo kaihhnawih ti ṭhin 32% an awm bawk. Hetihlai hian TB vei enkawl dam zat chu 86% a tling.

Ṭhukhawm chuan TB vei awm lohna khua (TB free village) ni thei tura hmalak meknaah mi 1,000-ah mi 30 zel endik an ngaih avangin district leh Health & Wellness Centre-te chu target test tlin a nih theih nan hma la ṭheuh turin an ti a; TB Free village ni theite hi kum tin World TB Day-ah chawimawina hlan an ni ṭhin a ni.

TB vei zawn chhuah hna (active case finding) chu district hrang hrangah nasa leh zuala kalpui tura tih a ni a, TB kài theihna nei sang leh vèi awlsamna hmun - HIV hrik pai, zunthlum nei, vaihlo kaihhnawih ti, zu in mi leh nau pai mek te, chaw ṭha hmu tlem te, refugee camp, jail, home, hmun kilkhawr leh tlawhpawh harsatna hmuna chengte zingah TB endikna hi nasa leh zuala kalpui an rêl.

Dr Eric Zomawia chuan, kum 2025-a TB umbo tura hmalak mekna chu ṭan a ngai hle tih a sawi a, "Thawktute'n phurna thar nen thawk ang che u," a ti a; TB chungchang inzirtirna chu nasa leh zuala thehdarh zel turin thawktute a ngen.