Chief Minister-in pawl 3 hruaitute a kawm
Chief minister Lalduhoma chuan nimin khan a pisaah Mizoram Bamboo Industries Association, Mizoram Overseas Placement Forum leh Aizawl City College Joint Student Union hruaitute a kawm.
Mizoram Bamboo Industries Association hruaitute chuan Chief Minister chu an hmalak dan te, harsatna an tawh mek leh hmalak dan ṭha zawk nia an hriatte an hrilh a, lawmpuina an hlan nghal.
Lalduhoma chuan, Mizoram Bamboo Industries Association hruaitute thil sawi zawng zawng chu mimal tak pawhin a tuipui em em vek tih a sawi a, "Sorkarin theihtawp chhuahin a ngaihtuah chho zel dawn a, pawl anga in harsatna te, industry malin harsatna an tawhte pawh fel taka ziakin ka hnenah rawn thlehlut rawh u," a ti.
Sorkarin theihtawp chhuaha puih a inhuam thu sawiin Lalduhoma chuan, "Entreprenuer-te lo ṭanpui che u hi sorkarin kan duh ber a ni a, sorkar tel lo pawhin thui takin in kal thei," a ti a, sorkar nena thui zawka an kal theih nan an mamawh belhte lo ngaihtuahsak an tum tur thu a sawi.
Mizoram Bamboo Industries Association hruaitute hian Mizoram mau a hauva hralh chhuah tawh rih loh ṭha an tih thu te, Rawṭhing a rawn tàm leh tawh dawn avangin harsatna a awm loh nan a chìn punna tur ngaihtuah ṭul an tih thu te, Mau Policy thar siam an duh thute an thlen a ni.
Mizo ṭhalai ram danga hnathawk tura thawnchhuak ṭhin pawl, Mizoram Overseas Placement Forum hruaitute nen an inkawmnaah CM Lalduhoma chuan, an harsatna sawite leh an hmalakna kawnga sorkar dan dinglaite chu a lo bihchian tur thu a hrilh a, "State sorkarin in hman theih dan a siam theih leh theih lohte pawh kan lo en dawn nia,' a ti.
Mizoram Overseas Placement Forum hruaitute hian Chief Minister hi lawmpuina hlanin, an hmalak dan leh harsatna te an thlen a ni.
Aizawl City College Joint Student Union hruaitute chuan chief minister Lalduhoma chu lawmpuina hlanin, zirlaite tribal scholarship chungchanga harsatna an tawh ṭhinte an thlen a; Chief Minister chuan Scholarship Board-a thawktute a lo sawipui tawh thu leh central lam aṭanga harsatna a awm loh chuan a hun taka scholarship hi pek chhuah zel an tum thu a lo hrilh.
Zirlai hruaitute'n hmunhma chungchang an dilna te, professor lak belh leh dahngheh chungchang an thlen te leh thildangte chu a theih ang anga bawhzui ṭha a tih thu Chief Minister chuan a sawi a; Higher & Technical Education Minister hnenah an rawtnate chu thlen turin a chah bawk.