MP K Vena'n all party leader meeting-ah Indo - Myanmar hung tum ṭhulh a rawt

Parliament Budgest Session neih tura inbuatsaihna atan nimin khan Parliament Library building-ah all party leader meeting neih a ni a; Rajya Sabha MP K Vanlalvena chuan sorkar laipuiin Indo - Myanmar ramri hung a tum chu ṭhulh a ṭul thu a sawi.

Rajya Sabha MP chuan colonial period-ah British roreltute'n Mizote chenna ram chu hmun thum - India, Bangladesh leh Myanmar-ahte an ṭhendarh thu sawiin, "Insuihkhawm leh hlan nghakhlel taka kan thlir reng laia Indo-Myanmar border fencing lo siam hi, kan political goal tih hlawhchhamna tur a nih theih avangin tih loh tur a ni," a ti.

Bangladesh ramri pawh Mizoram khawthlang lamah hung a lo ni tawh tih sawiin K Vanlalvena chuan, "A hmunah ka tlawh tawh a, khaw ṭhenkhat phei chu fencing pawnah a awm. Ramri lui thui tak sangha manna hmun ṭha tak tak hung pawnah dah a ni," a ti a, Mizoram Indo - Bangladesh border fencing pawh ṭhiah leh a ṭul thu a sawi.

K Vanlalvena chuan Myanmar sipai sorkar a chak loh tial tial tawh thu sawiin, "Chin Hills mipuite nen kan inkungkaih thûk tial tial. Indo-Myanmar ramri hung kan duh tak zet a nih chuan Chin State pumpui huam vekin kan hung tur a ni," a ti.

All party leader meeting hi Union Defence minister Rajnat Singh-a'n kaihruaiin, Parliamentary Affairs minister pahnih Pralhat Joshi leh Piyush Goyal-te pawh an tel.