Dan hnuaiah zel sorkar hnathawkte dinhmun leh hamṭhatnate bawhzui tum a ni - DPAR Minister

Mizoram Depart­mental Officers' Association (MDOA) chuan nimin khan Taxation auditorium-ah General Assembly vawi 13-na an hmang a; DPAR minister K Sapdanga'n hmanpuiin, "Dan hnuaiah zel sorkar hnathawkte dinhmun leh hamṭhatnate bawhzui tum a ni," a ti

K Sapdanga chuan, hun rei lote chhungin sorkar hnathawk zingah a tam zawk thil ṭha duh leh ṭhahnemngai tak an awm nia a hriat thu a sawi a, "Dan hnuaiah zel sorkar hnathawkte dinhmun leh hamṭhatnate bawhzui tum a ni. Sorkar pachhiat zia hretute ṭheuh kan nih angin kan khawsak phung pawh kan siamrem thiam a ngai dawn. Dan lalna ram, hnathawhnaa rinawmna lantirna leh inrelbawlna ṭha siam a nih theih nana hotute ṭawiawmtu nih tum ṭheuh ang che u," a ti.

Sorkar kalsual tur venpui tur leh thuràwn pek a ṭul châng pawha inthlahrung hauh loa pe zel tura kalkhawmte chahin K Sapdanga chuan, "Khua leh tuite tana ram ṭha, hlemhletna leh dan loa thil tih awm lohna ram siam tura hmalak tlân a pawimawh. Sorkar tharin sum leh pai dinhmun siamrem a nih theih nan inrenchemna a kalpui nghal," a ti a, sorkar thar lakluh nia Chief Minister-in ni 100 chhunga hnathawh tur ngaihpawimawh zual point 14 a puanah inrenchem chu thupui bera neih a nih thu a sawi.

K Sapdanga chuan ama enkawl Home department aṭanga bulṭanin, department dangte tana entawntlak ni tura inṭhuahfaia hmalak a nih thu leh February thla chhunga a nih ang tur tak ni pha thei tura lungrual taka ṭanlak a nih thu a sawi.

MDOA president C Vanlalchhuana pawhin thu sawiin, sorkar tibuaitu ni loa a ṭha zawnga kaihruai theitu nih tum ṭheuh tur te, mahni thawhna department-ah ṭhahnemngai taka thawk tur te, Mizoram sorkar leh mipuite'n an hlawkpui theih tur zâwnga hma la tur leh ram leh hnam rawngbawl kawngah ngaihtuahna dik tak hmang ṭheuh turin kalkhawmte a sawm.

He hunah hian MDOA member promotion hmu thar mi 32 leh MDOA hruaitu hlui R Lalrodingi hnenah pawl hmingin Minister chuan lawmpuina thuziak a hlan a; an pawl kal dan tur an rêl ho bakah, kum 2024-2026 chhunga MDOA hruaitu an thlang a ni.

MDOA hi kum 1983-ah din a ni a, kum 2003-ah sorkar recognition hmuh niin, department 31 aṭangin gazetted officer association member 500 chuang an awm mek a ni.