Theihtawp chhuahin ruihhlo kan do dawn - Excise Minister

Excise & Narcotics minister Lalnghinglova Hmar chuan theihtawp chhuaha ruihhlo an do tur thu nimina Excise & Narcotics dept. officer-te nen an meeting-naah a sawi.

Commissionerate of Excise & Narcotics conference hall-a department hmalak zel dan tur sawihonaah Excise Minister chuan, "Ruihhlo hi kan khap rêm vek thei kher lo ang, mahse, kan theihtawpin kan bei ang a, a rêm duak kan beisei. Ka sawi tawh ṭhin angin ruihhlo kan beihnaah hian department-a hnathawktute pawhin kan thil neihsate hi tun aia ṭangkaia hmangin kan theihna leh kan thiamnate kan tipung zel tur a ni," a ti.

Lalnghinglova Hmar chuan Chief Minister-in ruihhlo do a ngaih pawimawh thu sawiin, "Kan department rawn tlawhin, thuchahte a rawn sawi tawh a nih kha. Kei pawh vawi thum ka rawn kalna a ni ta der mai," a ti a, Mizoram sorkarin ruihhlo do chu a ngaih pawimawh tak zet thu a sawi.

An department-a thawktute chu an induhkhawp lo viau thei tih sawiin Excise Minister chuan , "Amaherawhcu, kohhran ṭhalai pawl hrang hrangte leh tlawmngai pawl hrang hrangte nen lungrual taka kan thawhho zel chuan ruihhlo donaah hian hma kan sawn zel ang," a ti.

Excise Minister sawi danin, hmanni lawkah kohhran hrang hranga ṭhalai hruaitute nen an inkawm tawh a, remchang hmasa berah Central YMA hruaitute dawr turin an department officer-te nen an leng dawn.

Meeting hi Excise commissioner Z Lalhmangaiha'n a kaihruai a, district hrang hranga Excise department hotute an tel kim vek a ni.