ZPM-in BJP ṭanpuina an dawng niin a lang - C Ngunlianchunga, MLA

Nimin khan Congress Party chuan Siaha Congress Bhavan-ah inkhawm an buatsaih a, thusawitu Congress MLA C Ngunlianchunga chuan ZPM-in BJP ṭanpuina an dawng ngei nia a lan thu a sawi.

C Ngunlianchunga chuan, Mizo upate'n 'pan loah tho a fu ngai lo' an lo tih kha a dik viau tih sawiin, "ZPM hian BJP ṭanpuina an dawng ngei niin a lang. An hla key lakna a sang hle mai a, an inzawrh dan angin an awm em tihte kan thlir ang. Anmahni budget siamte kan thlir ve phawt ang a, Mizo mipui rin ang an ni dawn em tih kan en dawn. Mipuite beisei an pha lo a nih chuan kan paih leh mai tur a ni," a ti.

Democracy ramah chuan kan inthlang tluk tluk mai dawn tih sawiin C Ngunlianchunga chuan, "Congress Party pawhin phur taka inthlan hmachhawn thei tura inlungrualna thar kan mamawh," a ti a, an inpumkhat ṭhat phawt chuan an hmabak inthlanah an thawh chhuah leh ngei tur thu a sawi.

Lawngtlai West Bialtu MLA chuan ZPM sorkarin chhim lam an hmusit hlea a hriat thu sawiin, "Minister nive âwm tak takte'n minister dinhmun an chang pha lo hi a pawi ka ti," a ti a, chhim lam bial hmasawnna a ngaih pawimawh anga an ngai pawimawh lo chu pawi a tih thu a sawi.

C Ngunlianchunga chuan district council sum pek dan thlirletin Congress sorkar kha chhim lam tan an hlu hle nia sawiin, "MNF te nena khaikhin chi pawh kan ni lo. Tun dinhmunah ZPM hian helam ngaihsak tura nihna an pek sân ber chu Adviser to Chief Minister (i/c Health) a ni," a ti.