KHAWTHLIR

Assembly Session

Governor Dr Hari Babu Kambhampati chuan 9th Legislative Assembly of the State of Mizoram Assembly Session vawi hnihna leh budget session hmasa ber tur chu February 19, 2023 chawhma dar 10:30 aṭanga ṭan turin a ko. Session programme kimchang chu Assembly speaker Lalbiakzama kaihhruai Business Advisory Committee-in an duang ang.

Hmalak dan tur sawiho

Aizawl East-II bialtu MLA B Lalchhanzova, minister of state leh AMC Ward No. VIII corporator Christina Roluahpuii Sailo hoin nimin khan Armed Veng khawtlang hruaitute leh UDPA hotute'n Armed Venga leiche ṭhin a reh theihna atana hmalak dan tur an sawiho. Bialtu MLA-in UDPA minister K Sapdanga a sawipui tawh angin UDPA chuan estimate an siam bawhzuiin sawihona hun hi buatsaih a ni.

CM Relief Fund

Mizoram Information Service Association (MISA) hruaitute chuan nimin khan chief minister Lalduhoma chu a pisah lawmpuina hlanin, Chief Minister Relief Fund atan Rs 20,000 an thawh nghal.

FIR thehlut

MZP chuan MZU-a Pd.D zirlai Teresa Ningthoujam-in Metei hel pawl Arambai Tengol tan pawisa khawna a hlan avangin nimin khan Vaivakawn PS-ah FIR an thehlut a, "Chi leh chi inkara buaina chawk chhuak thei zâwngin a ṭawng a ni. Teresa-i hian Arambai Tengol hnenah Zo hnahthlakte that chimit vek turin a ti," an ti. MZP hian MZU thuneitute hnenah Teresa Ningthoujam hi zir zawm phal lo turin an lo ngen tawh a ni.

MSU-in ngen

MSU chuan nimin khan Home minister K Sapdanga a pisa-ah kawmin, Mizorama hnam dang khawsa Meitei-te’n ILP an neih ngei theihna tur atana hma la tur leh boundary hnaiha department head post hrang hrangah Mizo ngei dah zel turin an ngen. Free Movement Regime thlah dul tumna leh border fencing tih tumna dodalna kawngah sorkar hmalakna thlawp zel an tum thu an hrilh bawk.