Rs 80,00,000 hu bengdar 339 a thlawnin sem

Governor Dr Hari Babu Kambhampati chuan January 29, Thawhṭanni khan Raj Bhavan Durbar Hall-ah ri hriatna ṭha lo, bengdar vuah ngaite hnenah a thlawnin bengdar a sem a; Home minister K Sapdanga'n a hmanpui.

A thlawna bengdar semna hi Coal India Limited, Kolkata, Deen Dayal Sravana Foundation (DDSF), Andra Pradesh leh National Programme for Prevention and Control of Deafness (NPPCD), NHM Mizoram-te ṭangkawp buatsaih a ni a; Mizoram pumah bengdar 339 sem tur niin, Governor hian mi 30 hnenah a hlan. Bengdar pakhat hi Rs 20,000 - Rs 60,000 man inkar a ni a, bengdar 339 hi a vaiin Rs 80,00,000 man vel a ni.

Governor Dr Hari Babu Kambhampati chuan World Day of the Deaf pualin September 25, 2023 khan a thlawna bengdar sem chhuah ṭum khatna neih a nih tawh thu a sawi a, "A thawh hnihna hmanga mi 339 hnena a thlawna bengdar sem chhuah a ni leh tur hi a lawmawm hle. Ministry of Social Justice and Empowerment hnuaiah Disabled persons for purchasing/fitting of aids/appliances (ADIP) kaltlangin pianphunga rualbanlote tan ṭanpuina a dawn theih a, sorkar laipui kaltlang hian hamṭhatna hmuh tur tam tak a awm," a ti a, Mizoramin sorkar laipui kaltlanga hamṭhatna awmte a dawn zel theih nan ṭanlak tlan a pawi­mawh thu a sawi.

Khualzahawm Home minister K Sapdanga chuan company, official leh ram hruaitute zinga mi harsate ṭanpui tura pen chhuak leh inpete fakawm a tih thu a sawi a, "Ri hriatna kawnga harsatna neite tana theihtawp an chhuahna hi a chhuanawm takzet. Ri hriat lama harsatna chuan rual pàwl leh nunphung thlengin a tih khaihlak phah a, Mizoram sorkar chuan rualban lohna hrang hrangte a ngaihsak zel dawn," a ti a, rualbanlote tana hmalakna reng reng a thlawp zel dawn thu a sawi bawk.

Bengdar hi Aizawl district-ah 207 sem chhuah niin, nimin khan Lungleiah 65 sem leh a ni a, February 1, 2024 khian Champhaiah 67 sem a ni leh tura ruahman a ni.