Lunglei leh Serchhip MJA-in inkhawmpui hmang

Lunglei leh Serchhip district Mizoram Journalist Association (MJA) chuan nimin khan an district ve veah annual conference an hmang a; Lungleia hmanpuitu minister Lalrinpuii chuan, langtlang sorkar a awm a, sorkar khalh ngil tur leh kawng ṭha leh dik lama mipui rilru sukthlek kaihruai turin chanchinbu mite an pawimawh thu a sawi.

Lunglei Press Club-a inkhawmah minister Lalrinpuii chuan, democracy ramah mipuite'n a hun takah thudik an hriat ṭhin a ṭul thu a sawi a, "Chutianga mipuite'n information dik an dawn theihna tura mi pawimawh berte chu kan chanchinbu mite hi in ni a, langtlang sorkar kan neih theih nan te, sorkar hotute'n an thutlukna siamah mawhphurhna tluan tling an lâk theih nan te, a ṭul ang zela sorkar khalh ngil tur leh kawng ṭha leh dik lama mipui rilru sukthlek kaihruai tur hian kan chanchinbumite hian theihna inngah a, in pawimawh em em a ni," a ti.

Health minister Lalrinpuii chuan Mizoramah ruihhloin bu a khuar ngheh tawh avangin dopui turin chanchinbumite a sawm a; "Specialist doctor leh super-specialist thiam tak tak kan neihte pawh hi an thiamna kan hman ṭangkai theih dan ber tur chu tunlai khawl changkang awmna hmuna dah a ni a, khawl awm miah lohna hmuna dahte hi wastage of man power dik tak a ni dawn," a ti a; chanchinbumite nen thawhhona ṭha tak neih zel a duh thu a sawi.

Chawhnu lamah kum 2024-2026 chhunga Lunglei District MJA hruaitu tur thlan a ni a, president-ah Laltlanthanga, vice president-ah Lalduhthlanga leh treasurer-ah V Rokhawlianate thlan an ni.

Serchhip Press Club-a MJA annual conference chu Serchhip district bawrhsap David Lalthantluanga'n a hmanpui a, "Media chu sorkar leh mipui inkar thlunzawmtu, sorkar hma lakna hrang hrang mipuite hrilhria a, an hnena thlen theih nana hmanraw pawimawh tak a ni," a ti.

David Lalthantluanga chuan, sorkar ṭha a awm theihna tura ban pawimawh, sorkar policy mipuite hnena puangzar tu, policy duangtute leh mipui rilru sukthlek dan kaihruai theitute chu chanchinbumite an nih thu a sawi a, "Ram hmasawnna tura thil ṭangkai article leh editorial-te ziak tam ang che u," a ti a, district chhunga sorkar hmalakna hrang hrangte pawh ziak uar a, a zirchianna lam hawizawngte pawh ziak tam turin MJA member-te a chah.

Kum 2024-2026 chhunga Serchhip District MJA hruaitu turin president atan C Lalhminghlua, vice president atan Kapliana Pachuau leh treasurer atan R Lamuansangate thlan an ni.