Department leh khawtlang hruaitute thu inhmufuh lo deuh a awm - P&E Dept.

Power & Electricity dept. chuan thuchhuah siamin, Lungdai Sentlang hmuna an pisa tihchhiat a nih chungchangah department leh khawtlang hruaitute thu inhmufuh lo deuh a awm thu an tarlang.

Lungdai Sentlanga thil thleng chu an minister F Rodingliana hoin uluk deuha an zir thu tarlangin P&E dept. chuan, "Tun hnuah hetiang hi a thlen tawh lohna atan department lam pawh inenfiah niin, hemi chungchang hi Kolasib DC pawh an thlirdan zawhfiah a ni," an ti.

P&E dept. tarlan danin, 2.5MVA, 33/11kV transformer Sentlang Sub-Station a awm chu ni January 14, 2024 khan êng chu pe chhuak thei siin, PHE tui pump-na khawl tan erawh chuan a hman theih lo a, ngun taka endik a nih hnuah HV-side winding-ah ṭha lo a awm tih hriat a ni.

A chhiat chhana pawh tui pump na khawl starting current sangin a shock avanga awm nia hriat a ni. Hetiang a ni chung hian êng pekna atan chuan hman a ni tho a, Sentlang Sub Station aṭanga power late chuan eng chu an nei reng a, tui pawh hi diesel generator hmanga pump tho a ni.

Tui pump nan leh eng ṭha zawka Lungdai Sentlangin an hmuh theih nan hian 3MVA 33/11kV transformer hmun danga hmanlai Sentlangah dah a ni a.

Transformer hman lai sawn a nih hian oil filtration darkar 48 tih a ngaih avangin, hman nghal mai theih a ni lo. January 27 ah khawtlang hruaitute leh department hotute chuan inhmukhawmin Bukpui Sub Station aṭanga power la turin ruahmanna zan dar 7:30 ah siam a ni. Hemi sub station in eng a pek khuate pawhin puih inhmuamin hnatlang turin mipuite an hrilh.

January 28 (Pathianni) zing karah P&E deptt duty-ten Lungmuat leh N Chaltlang inkarah ban pakhat sang deuhah a lo tliak tih an hmu leh si a, ban tharte phun a ngaih dawn avangin Pathianniah chuan eng kan inla lut hman turah an ngai ta lo a ni. Hnatlanga mipui ti hah lo a ṭhulh mai a ṭha tih a ni.

Hnatlang ṭhulh thu hi khawtlang hruaitute pawh zing dar 9:15 hrilh hman an ni. Hnatlan tum tho Sentlang Sub-Station aṭanga power la khua ṭhenkhatte chuan hnatlang hi an ṭhulh tho a ni.

Hun engemaw chen aṭang khan Sentlang Transformer bik hian PHE tui pump-na hi a zawh loh avangin, a start nan minute 20 chhung vel khawchhung eng pekna hi shut down a ni ṭhin a, hemi tih ziaawm nan hian transformer hi dah belh a ni.

Sentlang Sub-Station aṭanga eng hmu ṭhin khuate chuan department-in ruahmanna a siam angin Kawnpui aṭangin January 28, 2024 chhun dar 1:30 khan power an nei thei ta a ni.

Power transformer-ah rokhawlhna awm avanga mipuite eng pek theih loh chang a lo awm ṭhin. Kan transformer-te kum 20 aia rei service tawh 72% a awm.