MLA-in St. Paul's HSS hun hmanpui

St. Paul's Higher Secondary School (HSS) chuan nimin khan an sikulah 'Farewell cum Prize Distribution' an hmang a, Aizawl South-II bialtu MLA Lalchhuanthanga'n a hmanpui.

Lalchhuanthanga chuan tunlaiah ṭawng chi hrang hrang thiam a ngai tawh tih sawiin, "English kan thiam ang tho hian Mizo ṭawng leh Hindi-te hi thiam em em turin ka chah duh che u a ni. Board exam bei turte duhsakna ka hlan che u a, nangni generation aṭang hian thil ṭha kan beisei. Lehkha zirna piah lamah hian thiam thil kan zir tel tho tur a ni," a ti.

Entrepreneurship lama tui mite tan zirlai piah lamah skill set dah pawimawh a ngaih thu sawiin Lalchhuanthanga chuan, "Harsatnate hi kan hmachhawn ngam tur a ni a, huaisen takin harsatna kan neihte kan paltlang chuan hlawhtlinna kan chang ngei ngei dawn," a ti a, zirtirtu leh zirlaite tunlai thiamna sang tawh takah ṭan la thar leh zual turin a fuih.

Aizawl South-II Bialtu MLA chuan Pathian khawngaihna zarah ZPM-in sorkarna an chan thu sawiin, "ZPM policy-a pawimawh em em hand holding policy kan kalpui dawn. Kan ṭhalaite hian sorkar hna chauh ni lo hna an thawh a ngai. Chuvangin mahni tuina zawna eizawnna in neih theih nan sorkarin a pui dawn che u a, tun aṭang hian in ngaihtuahna insèn a ngai a, sorkar hna ringawt hian min daih seng lo," a ti.

Principal brother MS Kuriyan chuan inlawmna thu sawiin, HSSLC pass thar an sikul chhuahsan tawh turte thlah an ni.