Champhai district CD ratio 68.27%

Champhai District Consultative Committee chu an chairman James Lalrinchhana, bawrhsap hoin January 29, Thawhṭanni khan DC conference hall-ah an ṭhukhawm a; September-December 2023 chhunga Champhai district-a bank-te credit deposit (CD) ratio chu 68.27% a nih thu tarlan a ni.

Ṭhutkhawma tarlan danin, nikum September-December chhungin Champhai district-a bank hrang hrangte pawisa dawn zat (deposit) belh khawm chu cheng nuai 53,449 a ni a, advance (loan)-ah cheng nuai 36,491.22 pek chhuah a ni thung a, CD ratio chu 68.27% a ni.

James Lalrinchhana chuan, bank-te chu mipui leh khawtlang hmasawnna atana thawktu pawimawh an nih avangin, an hmalakna apiangah mipui hamṭhatna dah hmasa ṭhin turin a chah a; bank hrang hrang inkarah thawhhona ṭha a awm a ṭul thu a sawi.

Bawrhsap hian kum 2024-25 atana NABARD-in Potential Linked Credit Plan a tihchhuaha Champhai district tana ruahman cheng nuai 19,117.17 a tlangzarh nghal a ni.