Mamitah African Swine Fever sawiho
Mamit District Coordination Committee chu nimin khan bawrhsap Dr Lalrozama hoin DC conference hall-ah an ṭhu a; African Swine Fever vanga vawk khuahkhirh chungchang an sawiho.
Mamita AH&Vety officer Dr RL Ṭanpuii chuan, African Swine Fever kai vawkte chu an la thih zel thu a sawi a; sanghalte pawhin an kai theih thu sawiin, "A damdawi leh hri laka venna a la awm loh avangin a hlauhawm em em a ni," a ti. A natna lan chhuah dan chu, kawṭhalo leh khawsik sang tak a nih thu a sawi.
African Swine Fever dona atan Rapid Response Team din tawh a nih thu tarlan a ni a, hri laka invên dan tur leh hriat tur pawimawhte chu chanchinbu leh YMA vantlang aurinna hmanga a tam thei ang bera puanzar an rel. Ran talh ṭhinte chu district páwn lama mi la lut lo a, an district chhunga mi sa thianghlim leh hriat chian ngei chauh talh turin an chah a; ramri venga duty BSF leh police-te chu uluk zawka duty turin an chah bawk.
Committee-in hriat tur an tarlante
1. Hmun/ram dang aṭangin vawk lak luh loh tur.
2. Vawk note lâk thar chu in hrangah kar li chhung tal dah hran a, natna a neih leh neih loh thlithlai tur.
3. Vawk chaw chhum hmin ṭhat tur a ni a, chaw ningnawi pete'n uluk taka chhuan nawn ṭhin tur.
4. Vawkte chu rûlhût hlo, mineral leh vitamin pek ṭhin tur.
5. Ran-inte páwn lam mi tlawhtir loh tur.
6. Ni tin tuisen (3:10000) emaw, chinai tui (1%) emawin vawk-in tihfai ṭhin tur.
7. Ran enkawltuin ran-inah thawmhnaw hâk bik neih tur.
8. Vawk vulh lai an awmna sawn kual fo loh a ṭha.
9. Vawk chu a inah khung reng tur a ni a, mi dang vawk, sanghal leh ran dangte nen tlat pawlhtir loh tur.
10. Ran damlo reng reng a dahna bik siam a, an dam loh chhung chu dah hran tur a ni.
11. Ran damlo chaw pekna hmanrua reng reng, a dam lai chaw pek nan hman loh tur.
12. Ran damlo talh/hralh loh tur a ni.
13. Vawk talhna leh puahna ningnawite felfai taka phûm tur.
14. Vawk thi reng reng paih loin, thûk takah chinai nen phûm tur a ni.
15. Ran-inte fai taka enkawl a, an êk leh zunte then thianghlim ziah tur.