Zirlaite'n college zirtirtu dah ngheh phût; Raltlan kuta Mizote an thih leh chuan hawtir turin sorkar laipui ngen tum

Aizawl City College Joint Student Union (ACCJSU) hruaitute chuan nimin khan Aizawl Press Club-ah thuthar thehdarhtute an kawm a; kumin chhung ngeia RUSA hnuaia college zirtirtute dah nghet tura sorkar ngenin; "Myanmar raltlante kutah Mizoram mi an thi leh a nih chuan college hrang hrang zirlaite'n sorkar laipuiah Myanmar raltlante thawn haw turin kan nawr dawn," an ti.

ACCJSU general secretary Joseph Hmingropuia chuan, kum tin civil service exam buatsaih a nih laia college professor hna lak a awm belh tawh lo chu zirlaite hmasawnna daltu pakhat a nih thu a sawi a, "Mizorama college hrang hrang SU-te nen kan inbiakna aṭangin tunah hian Mizorama sorkar college 20-ah professor 189 vel indaih lohna a awm mek," a ti a, RUSA hnuaia a tira college zirtirtu 74-te chu dan angin kum hnih hnu velah dahngheh tur an nih laiin tun thlengin dahngheh an la nih loh thu a sawi.

RUSA hnuaia college zirtirtu 74-te chu Congress sorkar laia lak an nih thu leh tam tak chuan an dinhmun tur a chian loh em avangin an bansan leh tawh thu sawiin Joseph Hmingropuia, "Tunah chuan RUSA hnuaiah hian college zirtirtu 54 chauh an awm tawh. Chief Minister kan sawipui tawh a, college zirtirtu lak belh leh a nih hmain MPSC kaltlanga RUSA hnuaia thawk mekte hi kumin chhunga dahnghet turin kan ngen. Chief Minister chuan dah ngheh an nih tur thu min lo hrilh," a ti.

ACCJSU hruaitute chuan Myanmar raltlante chungchangah sorkar laipuiin ti tura a rawn tih angin ZPM sorkar chuan biometric data la ngei se an duh thu an sawi a, "Raltlante kutah Mizoram mi an thi leh ṭhin hi pawi kan ti hle. India ramin Geneva Convention 1951 (Refugee Convention)-ah hming a sign ve loh avangin raltlante a dawngsawng thei lo. Myanmar raltlan Mizorama lo lutte hi kan unaute ni mah se, India ram danah chuan dan loa lo lut (illegal immigrant) an ni," an ti.

Myanmar raltlante kutah Mizoram mi an thi leh a nih chuan college hrang hrang zirlaite'n sorkar laipui hnenah Myanmar raltlante thawn haw turin an nawr dawn tih sawiin ACCJSU hruaitute chuan, Myanmar raltlante mumal taka khuahkhirh tur leh September 28, 2022-a Aizawl DC-in Myanmar aṭanga lo lutte kaihhruaina dan a siam chu khauh lehzuala kengkawh turin sorkar an ngen nghal.

ACCJSU tarlan dangte:

■ Mizoramah hnam bil puala pawl din belh awm tawh lo se kan duh.

■ Pawl hrang hrang ding tam lutuk hian zirlaite hmasawnna tur tam tak a dal.

■ Pawl hrang hrangte'n an din chhan hrechiangin, an mahni kaihhnawih thil ni loah chuan inrawlh tam tawh lo se.

■ The Forest Conservation & Amendment Bill 2023 hi Zofate tan a him lo a, sorkarin hman a nih loh nan hma la se.