Education Minister-in an kal dan tur a sawifiah : Zirtirtuah minister leh ZPM list a awm dawn lo; Syllabus leh question pattern siamṭhat tum a ni
Education minister Dr Vanlalthlana chuan nimin khan a pisa-ah thuthar thehdarhtute kawmin, zirna in hma a sawn theihna atana an department kal dan tur a sawifiah.
Dr Vanlalthlana chuan, SSA hnuaiah zirtirtu 161 lak a ni dawn tih sawiin, "Ṭum dang ang loin interview hmang chauhin kan la dawn lo, written tih tel a ni dawn. Chubakah naupang zirtir an thiam dawn em tihte pawh kan en tel ang. Zirtirtu lak turah hian minister leh ZPM list a awm dawn lo," a ti.
Interview-ah department mite bakah 3rd party observer an awm dawn tih sawiin Education Minister chuan, "Observer-te hian zawhna an zawt dawn loa, mark chu an pe ang. An mark pek erawh hmun dangah an thehlut thung ang," a ti a, department mite mark pek leh observer mark pek a in an loh lutuk chuan en ṭhat a nih tur thu a sawi.
Education Minister chuan ṭhalaite'n hna lak a fair tawk tih an pawm a, sorkar hna lakah beiseina an neih theihna turin a tir aṭangin fair taka hna an lak dawn thu sawiin, "A tling lote pawhin fair takin an tling lo a ni tih an pawm theihna turin kal kan tum," a ti.
Dr Vanlalthlana chuan National Curriculum Framework lo chhuak thar tur hmangin elementary level syllabus siamṭhat tum a nih thu sawiin, "Board exam question standard zirchian tum a ni. Zirlaite'n a bulthûm an man theihna atan chîk taka chhût thiamna leh ngaihtuah dan thar an neih theih nan syllabus leh question pattern siam kan tum," a ti.
Zirtirtu indaih lohna siamṭha turin zirtirtu thawk lai mek semrual ṭul an tih thu sawiin Education Minister chuan, "Zirtirtu transfer leh posting hi Mizoram Education (Transfer and Posting of School Teachers) Rules, 2006 leh chumi dan kum 2020-a siamṭhat hmangin kalpui ṭhin a ni. He dan hman laia siamṭhat ngaite lo zirchiang turin sorkar official ruat an ni," a ti a, an zirchianna report hi February 2, 2024 hmaa thehlut tura beisei an nih thu a sawi.
Education Minister chuan Mizorama zirna kalphung siamṭha turin Mizoram Education Reforms Committee a din thu sawiin, "He committee hian elementary education chauh ni loin, higher education pawh a huam dawn. Education Minister chairman a ni ang a, working chairman ruat an ni ang. Committee hian zirna siamṭhat dan tur an ngaihtuah dawn," a ti.
Zawhna chhangin Dr Vanlalthlana chuan sorkar hmasain sikul a upgrade dawnin Finance leh DPAR-ah tih tur ṭul an ti lo tih sawiin, "Chubakah sikula zirlai zat report dik tawk lote a awm. Finance leh DPAR zirchian turin kan thawn leh dawn," a ti a, Finance leh DPAR thutlukna angin kalpui a nih tur thu a sawi.
Education Minister sawi dangte :
▶ Zirna kawng hrang hranga thurawn lakna tur leh Mizoram zirna kalphung zir bingna leh ruahmanna buaipui turin Education Consultant ruat tum a ni.
▶ HSLC exam-a ti ṭha zual zirlai 50 thlan chhuah a, uluk bika UPSC exam atana kaihhruai ṭha tih a ni.
▶ SEDP hnuaia teaching leh non-teaching staff lakte March 31, 2024 thlenga thawk tura lak an ni a, SEDP a tawp tak avangin rawih an nih hun chhung bak pawhsei sak a rem dawn lo.
▶ SEDP non-teaching staff-te tihtawp nghal tur nimah se, zirna in a tuar hlauhthawn avangin March 31, 2024 thleng an kal remtih a ni.
▶ Directorate of School Education-in an report angin post hnawhkhah ṭul hnawhkhah vat a ngai dawn a, hmalak mek a ni.
▶ Education department hnuaia teaching leh non-teaching staff aikal late list DPAR hnenah thehluh a ni tawh. An dinhmun tur chu DPAR ngaihchan a ni.
▶ Academic year tharah National Education Policy, 2020 guideline angin pawl 3, 5 leh 8-ah random examination neih tum a ni.
▶ Right to Free and Compulsory Education Act, 2009 leh National Education Policy, 2020 milin Education dept. inkaihhruaina hrang hrang ennawn a, a ṭul ang leh tunlai mila her rem tura hmalak tum a ni.
▶ Muster roll zirtirtute dinhmun tur Mizoram Education Reforms Committee-in a ngaihtuah ang.
▶ Zirtirtu pakhat chiah awmna kum khat chhungin tihbo a ni ang, hmun kilkhawr berah pawh.
▶ A tam thei ang thingtlangah zirtirtu quarter sak tum a ni.