India leh Myanmar ramri hung tumah sorkarin tunhnaiah thu dawn a nei lo

India leh Myanmar inrinate sorkar laipuiin hung a tum chungchangah tunhnaiah Mizoram sorkar chuan sorkar laipui aṭangin thudawn a nei lo.

Vanglaini palai zawhna chhangin Home secretary H Lalengmawia chuan, ramri hung chung­changah tunhnaiah thudawn an neih loh thu a sawi a, "Tunhma deuh kha chuan thudawnte kan neive ṭhin. Tunhnaiah erawh thudawn engmah kan nei lo. Union Home Minister-in ramri hung chungchang a sawi leh hnuah phei chuan thudawn engmah kan la nei lo hrim hrim," a ti.

January 20, 2024 khan Assam-ah Union Home minister Amit Shah chuan India leh Myanmar inrina chu Bangladesh ramri anga hung vek a ṭul thu sawiin, "Prime minister Modi kaihhruaina hnuaiah dan leh thupek lamah ramin hma a sawn nasa hle. Ramchhung himna Congress sorkar laia buaina tam tak awm ṭhin kha nasa takin a reh tawh," a ti a, free movement regime (FRM) pawh tihtawp thuai a nih dawn thu a sawi.

Hetihlai hian Mizoram sorkar leh NGO-te chuan India leh Myanmar inrina hung leh FRM tihtawp hi an duh lo. Chief minister Lalduhoma chuan Prime Minister leh Union Home Minister hnenah hemi chungchang hi a thawn tawh a, NGO-te pawhin ziakin sorkar laipui hotute hnenah an thlen tawh.