President atan CM lalut

Chief minister Lalduhoma chu nimin khan CM conference hall-ah Bharat Scout & Guides Mizoram state patron Rev Dr CL Hminga'n state president atan a lalut a; Education minister Dr Vanlalthlana leh Sports & Youth Services minister Lalnghinglova Hmar-te chu vice president atan lakluh nghal an ni.

Lalduhoma chuan, scout & guides hmalakna chu khawvel huapa fak leh chawimawi a nih thu a sawi a, "Mizoramah ngei pawh an kaihhruai ṭhalai tam takte mi hlawhtling leh chhuanawm tak takah an lo chhuak tawh a, khawtlang tan thil ṭha tam tak an lo thawk tawh ṭhin," a ti.

Chief Minister chuan scout & guides thiltum leh hnathawhte chu Mizote pawhin kan mamawh em em a nih thu sawiin, "Nasa zawka hma la a, Mizo ṭhalaite nunkawng dik leh mahni kea ding thei tura zirtir uar a pawiawh," a ti a, thawhpui leh ṭanpui an ngaihna kawng tinrengah a in peih thu a sawi.

Vice president thar atana lakluh Dr Vanlalthlana leh Lalnghinglova Hmar-te pawhin thu sawiin, scout & guides chu khawvel huapa pawl zahawm leh ṭhalaite kaihruaitu pawimawh a nih avangin Mizoramah pawh uar deuh deuh a ṭhat thu leh hmalakna zingah ruihhlo do lam pawh nasa zawka kalpui ṭhaa an rin thu an sawi.