Zângnadawmna dawng tawh an in ṭhiat duh lote ṭhiahsak an ni
Serchhip district-a thuneitute chuan national highway-54 laihzauh leh siamṭhat hna thawh mekah an district chhunga zangnadawmna la tawh, in la ṭhiat lote leh in saklai an ṭhiah sak bakah green house leh sorkar ram lak china bungraw chhawpchhuahte an thianfai.
Serchhip DC David Lalthantluanga, CALA hoa January 29, 2024-a an lo rel tawh bawhzuiin nimin khan executive magistrate pali HD Lalpekmawia, Gaston Vanlalhriatpuia, Daniel Sailo leh Lalhruailiana Zote-te kaihhruaiin Khumtung, Chhingchhip, Chhiahtlang leh Baktawng khuaah Eviction Team-te hi an che chhuak a, zangnadawmna sum a pumhluma la tawhte, an in ṭhiat duh lote lakah dan angin hma an la a ni.
NH-54 kawngpui laih mekah Serchhip district huam chhunga sorkarin ram a lak fel tawh, dan anga zangnadawmna sum leh pai dawng tawhte zingah in leh lo ṭhiat duh lo luite hi July leh August, 2023 khan magistrate-ten an inah ngei kal chilhin an inte ṭhiat tura thupek (eviction notice) an pek bakah, November 22, 2023 khan CALA chuan a hmunah tlawhin an ṭhiah loh chhante a endik. Eviction Drive thawh khatna chu November 28, 2023 khan neih niin, in pakhat ṭhiah a lo ni tawh a ni.
Heng khaw paliahte hian chhungkaw eng emaw zat chuan an in hi an ṭhiah mek avangin ṭhiah sak ngai loa lo ṭhiat chhunzawm zel tura hriattir nghal an ni. Hetihlai hian la ṭhiat ve lo in eng emaw zat chu sorkarin ram a lak tawh right of way (ROW) chinah chhinchhiahin, khawl hmangin ṭhiahsak an ni.
In ṭhiahnaah hian Serchhip aṭangin police, NHIDCL leh contractor-te bakah khawtlang hruaitute an tel. Buaina leh harsatna awm loa hmalak niin IPC Section 188 hmangin thubuai siamsak an ni dawn. District thuneitute chuan zangnadawmna la tawh, mahni in la ṭhiat lote chungah dan angin hma an la chhunzawm zel dawn a ni.