KHAWTHLIR

ZPM hruaitu thlan hun

ZPM General Headquarters executive nimina an president Lalliansawta kaihhruaia Republic Veng Community Hall-a ṭhukhawm chuan ZPM Gen. Hqrs. hruaitu thlan hun tur an rel a, inthlan hun atan February 15, 2024 an ruat. Meeting chuan hun rei lote chhunga Lalduhoma kaihhruai Mizoram sorkar kal dan lungawithlak an ti.

CM-in kawm

Chief minister Lalduhoma chuan nimin khan a pisaah Mizoram Rubber Society (MIRSO) hruaitute a kawm a, Mizorama ṭhelret (rubber) chíngtute hmasawnna tur thil pawimawh hrang hrang a sawipui.

Office hawng

Minister Lalrinpuii chuan nimin khan a bial chhung Lunglei East Assembly Constituency mipuite'n awlsam zawka an dawr theih nan Lunglei Chanmari-II-ah MLA office a hawng. Lalrinpuii chuan, "Mipuite tana awlsam zawk leh Aizawl kal kher ngai loa mipuite'n Minister an dawr theih nan te, mipuite harsatna leh mamawhte ngaihthlak sakna tur atana he office hi ruahman a ni," a ti.

Minister-in tlawh

Sports & Youth Services minister Lalnghinglova Hmar chuan nimin zing khan Chite venga Sport Complex sak mek a tlawh a; bialtu MLA B Lalchhanzova, minister of state leh bialtu corporator Christina Roluahpuii Sailo bakah, khawtlang hruaitute'n an ṭawiawm. Minister hian contractor-te kawmin, hmalak zel dantur an sawiho a; Chite Veng Urban Primary School kalpui dan tur an enho nghal bawk.

Chairman ruat

Mizoram sorkar chuan Mizoram Handloom & Handicrafts Development Corporation (ZOHANDCO) chairman atan Lalliansawta, Mission Veng leh Mizoram Khadi & Village Industried Board (MKVIB) chairman atan C Lalremliana, Champhai a ruat.