Minister-in office hun chhunga ruite Excise hnena hlan ngam turin a ngen

Minister Lalrinpuii chuan nimin khan Lunglei district-a sorkar department hotute Lunglei Convention Centre-ah a kawm a, "Office hour chhunga rui ngam khawpa huaisente kan nei a nih chuan Excise dept. lama hlan ngam khawpa officer huaisen ni ṭheuh turin ka ngen che u a ni," a ti.

Lalrinpuii chuan Mizoramah ruihhloin bu a khuar ngheh tawh avangin anmahni zawn ṭheuhah dopui turin department hotute a sawm.

Inrenchemna (austerity measures) chungchangah Minister chuan, "Kan resources neih chhun ang angte hi a ṭangkai thei ang ber, a ṭha thei ang ber, a in ren thei ang berin hmang i la, pen leh paper mai mai aṭangte hian hma la ṭan ang u. Tui mal far tê têin luipui a siam angin tlem tlema kan inren ṭheuh chuan hmasawnna liantham zawk a chhuah ngei ka beisei. Office bungrua leh hnathawhna hmanruate mahni ta anga dim leh ren taka hman tur," a ti.

Lalrinpuii chuan ZPM sorkar tharin ram hmasawn nan hmachhawp tam tak a neih nghal thu a sawi a, "District level-a ZPM policy mil budget in lo siam tawh ka ring a, Lunglei district tana hmasawnna tak tak tur mil budget hi min ngaihtuahpui zel ang che u. Mahni bank account-a sorkar sum dah chungchangah pawh in lo inchinfel vek tawh ka beisei," a ti a, tlai dar 4-ah kim taka staff zawng zawngte nena bang ho ṭhin department hotu ni ṭheuh turin a chah nghal.

Lungsen Aspirational Block chungchangah Minister chuan, "Tehna hrang hrang hmanga teh a nih hnua chàwikàn ngai zual block, Lungsen block hi department hrang hrangin i ngai pawimawh tlâng ang u. Keini Health department lam chuan hma kan la nghal a, Health & Wellness Centre kan hawn tharah pawh thawktu kan dahkim nghal," a te.

Minister chuan department hotute'n harsatna leh mamawh an neih an thlente chu theihtawp chhuaha hmalak sak a tum thu a sawi.

Inkawmhona hun hi district bawrhsap Ramdinliani'n a kaihruai a; Lunglei West bialtu MLA T Lalhlimpuia leh Lunglei South bialtu MLA Lalramliana (Papuia) te pawh an tel a ni.