Raltlante kaihhruaina tur tichhuak

Mamit DC pisa chuan Mamit district-a Myanmar raltlan awm mekte zawm tur inkaihhruaina a tichhuak a; inkaihhruaina hi bawhzui turin Village Level Committee on Myanmar Refugees-te a hriattir.

Sorkar thuchhuah tarlan danin, Mamit district-a raltlan lut tur reng reng chuan an awmna tur khuaa Village Level Committee on Myanmar Refugees phalna an nei hmasa tur a ni a, an awm veleh an chanchin kimchangte Village Level Committee on Myanmar Refugees-ah an chhinchhiah tur a ni.

Raltlante zingah inkaihhruaina zawm lo an awm a nih chuan Nodal Officer on Myanmar Refugees & Additional DC hnenah emaw, bialtu SDO(C)/BDO-te hnenah emaw hriattir tur a ni.

Raltlante kaihhruaina

▶ Sorkar hriatpuina leh phalna lo chuan Myanmar raltlante'n ram leh in lei phal a ni lo.

▶ Dawr siam leh sumdawnna lam chí reng reng sorkar hriatpuina lo leh phalna lo chuan an ṭan tur a ni lo.

▶ Ei leh bar zawnna leh ni tin khawsakna – inhlawhfâk, huan, nûl siam etc.-ah sorkar leh an awmna khawtlang hruaitute duh dan an zawm tur a ni.

▶ Dan phal loh thil - zu, drugs leh a dangte district chhungah ken luh emaw, sumdawn nana hman phal a ni lo.

▶ Raltlan te'n Aadhaar card/voters ID/birth certificate/driving license/residential certificate leh a dangte an siamtir tur a ni lo.

▶ Myanmar aṭanga Mamit district chhunga lirthei ken luh reng reng mumal takin an awmna khuaa Village Level Commíttee on Myanmar Refugees hnenah an hriattir ṭhin tur a ni.