Delhi leh a chhehvelah inbumna a tam, Mizo ṭhalai an inhnamhnawih - DMZP

Delhi Mizo Zirlai Pawl (DMZP) chuan thuchhuah siamin, hun eng emaw chen kalta aṭang khan Delhi leh a chhehvel (Delhi NCR area- Noida, Greater Noida, Gurugram, etc.)-ah hna leh sum kaih-hnawiha inbumna thil ni thei âwma lang a tam hle nia an hriat thu an tarlang.

DMZP chuan, inbumnaah hian Mizo ṭhalai inhnamhnawih pawh an ṭhahnem hle tih an hriat thu tarlangin, "Pawi kan ti tak zet a ni. Hemi chungchang hi uluk takin dan hre mite, corporate lama mithiamte leh lo inhnamhnawih tawh ṭhin, a ṭhat lohzia hriaa bansan tawhte nen chhui chianga inrawnkhawmna pawh vawi eng emaw zat kan nei tawh," an ti.

Inbumna thilah hian a tlangpuiin hna tak tak thawh hmain cheng nuai 1-2 inkar thawh hmasak a ngai ṭhin tih tarlangin DMZP chuan, "Company pangngai tak hna lak ang thei tur berin engkim formal takin an kalpui ṭhin niin a lang," an ti a, Mizo ṭhalai lehkhathiam hna zawng mekte an target ber thu an sawi.

DMZP tarlan danin, an zirchianna aṭanga an hmuh danin heng inbumna thilah hian mahni lam hnai leh ṭhian hnai tak takte pawh an inbum chhuak nual niin a lang. Chuvangin hetiang hna leh sum kaihhnawiha thlemna lam chi reng rengah pawh min thlemtute kan chhungkhat hnaivai emaw ṭhian ṭha tak pawh nise mahni phak ang tawka zaua zirchian hmasak zel a ṭha.

Inbumna ni thei awm anga lang thlemna tawka Delhi-a hnathawka kal tumte reng reng chu an hnathawhna hmun tur leh an hnathawh turte hriatchian nan engtiklai pawhin DMZP chuan an hruaitute be hreh lo turin an chah.