Champhai district-ah kumin chhungin thubuai pariat ziahluh a ni tawh

Champhai district-ah kumin chhungin heroin kg 2.170 man a ni tawh a, thubuai pariat ziahluhah mi 11 man an ni.

Nimina Champhai District Level Narco Coordination Centre (NCORD) Committee ṭhutkhawma tarlan danin, kuminah Champhai Police-te'n NDPS Act hnuaiah thubuai pariat an ziaklut a, mi 11 an man. Heroin kg 2.170 an man bawk.

Kum 2023 chhung khan Champhai Police chuan NDPS Act tlawhchhanin thubuai 134 an ziaklut a, mi 153 man niin an zinga mi 54 chu ram dang mi an ni. Nikum chhung khan Champhai Police-te hian heroin kg 33.503 an man a, hei hi kum 2023 chhunga Mizoram Police-in heroin an man zawng zawng aṭanga chhûtin 53.13% a tling.

Methamphetamine kg 111.817 an man a, solid crystal meth kg 4.59, ganja kg 11.35 leh alprazolam mum 450 bakah, ruihhlo phurhna lirthei 30 an man a ni. Champhaia Excise & Narcotics dept. chuan November - December, 2023 chhung khan heroin kg 2.176, methaphetamine kg 22.220, crystal meth kg 1 leh ganja kg 14.500 an man a, hemi kaihhnawiha an mi man mi 10-te chu an chhungte remtihnain Home-ah dah an ni.