MZP-in PM leh HM lim an hál

Mizo Zirlai Pawl (MZP) General Headquarter chuan nimin khan an pisa kawtah India leh Myanmar ramri hung tumna leh Free Movement Regime (FMR) tihtawp tumna an duh lohzia lantir nan prime minister Narendra Modi leh Union Home minister Amit Shah lim an hal.

MZP chuan thuchhuah siamin, India, Myanmar leh Bangladesh-ah Zo hnahthlakte ṭhendarh an nih thu a tarlang a, "India ram chhungah pawh state hrang hrangah kan inṭhendarh bawk. He'ng Zofate min ṭhendarhtu ramri hi Zofate ràwnna leh remtihna awm hauh loa British-in a siam a ni a, Zofate tan chuan engti kawng maha pawm chi a ni lo. Zofate hian heng ramrite hi kan rilru tak takin kan pawm ngai lo," a ti.

India sorkarin Chin state leh Mizoram state zalen taka inkalpawhna Free Movement Regime (FMR) tihtawp leh ramri hung a tum chu pawi an tih thu tarlangin MZP chuan, "United Nations Declaration on the Rights of Indigenous Peoples (UNDRIP) 2007 Article 36) chuan, 'Tualchhuak hnamte, a bik takin khawvel sorkar ramri khamin a ṭhendarhte chu an inkalpawhin an inlaichinna tinghet tur leh inṭanpui tawn a ṭul pawhin an inṭanpui tawn ang a, sakhaw thil leh khawtlang thil, ei leh bar leh politics-ah te an mahni mi leh sate nen inpawha inpawlho theihna dikna chanvo an nei. Ram roreltute chuan tualchhuak hnamte nena inbe rawnin hetiang dikna chanvote hi tipuitling turin hma a la ang,' tiin chiang takin a ziak," a ti a, ramri hung leh FMR tihtawp hian Zofate a ṭhendarh dawn avangin pawm theih a nih loh thu a tarlang.

MZP chuan, danin a phal loh ruihhlo leh khap thilte chu ramri hung kher lo hian a tihrem dan dang ngaihtuah zawk turin sorkar laipui an ngen a, ramri hung leh FMR tihtawp chungchangah hian a ṭul angin hma lakzel an tum thu an tarlang bawk.