CYMA-in employment agency-te an kokhawm

Central YMA chuan nimin khan an pisa-ah India ram chhung leh rampawna ṭhalai hnathawk tur thawn chhuak ṭhin employment agency-te kokhawmin ramdanga hnathawka chhuakte harsatna tawh chungchang leh thawhho dan turte an sawipui.

Inkawmhona kaihruaitu CYMA president Lalhmachhuana chuan ṭhalai hlawhtling ngei tur leh rintlakte chauh ram pawna hnathawk tur hian thawn ṭhin tur leh fimkhur taka hma la ṭhin turin agency-te a chah a, "Ṭhalai hna zawng lai ramdanga hnathawk turte pawh mahni nihna dik tak leh document dik chauh hman tur. A theih angin CYMA-in mumal zawka agency-ten hna an thawh theih dan turah ngaihtuahna a seng dawn," a ti.

Agency hrang hrang aiawhte chuan Mizo ṭhalai hnathawk tura ramdanga an thawn chhuah dan kalhmang leh harsatna an tawhte an sawi a, "Mizoram sprkarah deputy commissioner kaltlangin license kan nei," an ti a, The Mizoram Private Placement Agencies (Regulation) Act, 2015 hmanga hnathawh ṭhin an nih thu an sawi.

CYMA hruaitute chuan Mizo ṭhalai eng emaw zatin ramdangah hna thawk tura an kal theihna tura agency-te hnathawh leh Mizo ṭhalaiten eizawnna an nei thei chu lawmawm an tih thu sawiin, "Chutihrualin rampawna hnathawk ṭhalai harsatna tawkten kan hnenah harsatna an neihte an thlen ṭhin. Hemi avanga inkawmna hi buatsaih kan ni," a ti.

Document dik tak hmang a hnathawk tur thawn ṭhin tur leh kum tling lote thawn lo turin CYMA hruaitute chuan agency-te hi an ngen a, an thawn chhuahte pawh en zui zel tur leh an harsatnate chinfel kawngah mawhphurhna la zel thei turin an chah.