Road Safety Month hman ṭan a ni: Lirtheia chetsualna a pung - Transport Minister
Transport minister Vanlalhlana chuan nimin khan Assembly Annexe conference hall-ah 'Road Safety Month -2024' a hawng a, lirtheia chetsualna a pun thu a sawi.
Vanlalhlana chuan, Mizoram State Road Safety Council hmalakna hnuaia Mizoram puma lirthei khalhtu leh kea kalte himna tura uar zawka inzirtirna leh dan hmanga enfiahna nasa zawka kalpuina tur 'Road Safety Month, 2024' chu sorkar hmalakna pakhat ang leka hman a nih chuan a hlawhtlin dawn loh thu a sawi a; a tihlawhtlingtu nih tum ṭheuh turin lirthei khalhtute thlawpna a ngen.
Mizoram chu mipui cheng zat aṭanga chhûta lirthei chetsualna vanga nunna chân tamna a nih thu sawiin Minister chuan, "Kum 2021 leh 2022 dinhmun khaikhinin Mizoram pumah road accident 92.8%-in a pung a, nunna chân pawh 101.79% in a pung," a ti a, lirthei khalhtute leh mipui zawm tur dan hrang hrangte chu himna tura siam a nih angin ṭha taka zawm turin mipui a chah.
He hunah hian Transport joint director (Hqrs) Zothangzuala Chhangte kaihhruaiin Road Safety Month thutiam sawirual a ni.
Road Safety Month vawi hnihna hi Mizoram pumah February thla chhung hman a ni dawn a; February 12-17, 2024 chhungin No Tolerance Drive kalpui a ni ang. Road Safety Month chhung hian lirthei fitness uluk lehzuala endik, zirna-in hrang hranga Road Safety thutiam sawirual, PWD kaltlanga lirthei chetsual nasatna hmuna chiang taka hriattirna siam, Road Safety awareness a tam thei ang ber buatsaih leh media kaltlanga inzirtirna siamte kalpui tum a ni.
Kumin Road Safety Month thupui chu 'I him theih nan Traffic Rules-te zawm ṭhin ang che (Obey traffic rules for your own safety)' tih a ni.
Transport Minister thusawi dangte
▶ Annual Report on Road Accidents in India, 2022 in a tarlan danin, kum 2022 chhungin road accident ṭum 4,61,312 thlengah mi 4,43,366-te'n hliam an tuar a, mi 1,68,491 an thi.
▶ Minute 3 leh a chanve dan zelah lirthei hmanga thihna a thleng ang a ni.
▶ Tlan chak lutuk chu chetsualna thlentu lian ber (72%) a ni.
▶ April-December, 2023 chhungin lirthei ziahluh thar 3,01,680 a awm a, thla 9 chhunga lirthei ziahluh hian kum hmasaa ziahluh zat a khum tawh.
▶ Lirthei pung nasa hian khawpui tawt siamin, kawng inchuhna a siam chho mek zel.
▶ Lirthei khalhtute'n hawihhawmna leh dan leh hraite ngaih pawimawh a ṭul.
▶ Licence lak dawna dan zawm tur tarlante lirthei khalhtute'n an hriatreng a ngai.