Treasury-te ni 15 chhung regular payment tihtawptir an ni - MNF

MNF chuan thuchhuah siamin, December 2023 chawhnu lam ni 15 chhung Treasury-te regular payment tihtawptir vek an nih thu an tarlang.

ZPM-ten sorkar hmasa sum enkawl thiam lo em emah an puh nia tarlangin MNF chuan, "Anmahni ngeiin sum an enkawl hneh lohzia an pholang chiang ta mekah kan ngai. December 2023 chawhnu lam ni 15 chhung khan emergency a pekchhuah ṭul tak tak bak regular payment chu Finance dept. lamin Treasury-te an tihtawptir vek," a ti.

MNF tarlan danin, Treasury-te regular payment tihtawp tir an nih thu hi opposition leader Lalchhandama Ralte-in a sawi chhuak a, dawt sawi ang hiala puh nimah se, thudik a sawi ngei a ni.

MNF chuan sorkar hmasa-a Finance Minister chu ZPM-in sum enkawl thiam lo leh ti ṭha duh lo ang hialah an puh ṭhin tih sawiin, "MNF sorkar laia Treasury-in sum pekchhuah a control zeuh zeuh ṭhin kha Treasury khar tiin an lo aukhum chamchi tawh. Sum enkawl thiam tura insawi ZPM sorkar chuan an rawn tawng ve ta," an ti.

An ṭawngkam cheh ang chiah an chunga tla ta chu anmahni ngumkhak hmu lo ang maiin 'Treasury khar a ni lo' tiin ZPM-te chu an ṭangkawh nia tarlangin MNF chuan, "Heng an sum enkawla harsatna an tawh chu thup buai lo tur leh an harsat avanga OMB aṭanga cheng vbc. 80 an puk hi sawi mawi tum loin, sum enkawl an thiam loah inngai se kan duh," an ti a, Treasury thawktute hmanga insawi thiam tum chhen tawh lo turin an phut.